Хатлон: Иқдоми «Кино ва тамошогар»

Душанбе, 4.03.2015. (АМИТ «Ховар», Мавҷуда Анварӣ).-Бо ибтикори киностудияи давлатии «Тоҷикфилм» моҳи март дар вилояти Хатлон иқдоми вижае бо номи «Кино ва тамошогар» барпо мегардад. 
Алишер Собиров, сардори шуъбаи банақшагирӣ ва истеҳсолоти «Тоҷикфилм» иброз намуд, ки дар чаҳорчӯби ин иқдом беш аз 10 филми истеҳсоли Тоҷикистон ба сокинони Хатлонзамин тамошо дода мешавад. 
«Иқдом ҳудуди 10 рӯз идома карда, барои ҳама табақаҳои ҷомеа: аз наврасону ҷавонон то аҳли зиё нигаронида шудааст. Мехоҳем, ки ба ин васила мардум дубора ба филмҳои ватанӣ рӯ биёранд», — афзуд А. Собиров. 
Ҳадафи иқдоми мазкур таблиғи синамои тоҷик ва даст ёфтан ба рушди ин навъи санъат дар Тоҷикистон мебошад. 
Дар доираи иқдоми «Кино ва тамошогар» намоиши филмҳои маъруфи тоҷикии истеҳсоли замони Шӯравӣ — «Қисмати шоир», «Рустаму Сӯҳроб», «Ҳасани аробакаш», «Марги судхӯр», «Марди мутааллиқи ду зан», «Дарди ишқ», «Ситораҳои сари танӯр», инчунин филмҳое, ки пас аз касби истиқлол таҳия шудаанд, ба мисли «Муҷассамаи ишқ», «Қиёми рӯз», «Қош ба қош», «Овора», «Ойинаи беҷило», «Муаллим» ва филми мустанади «Ваҳшати ҷанг» дар назар аст.