Хуҷанд: Раъйдиҳии 80 фоизи интихобкунандагон

Хуҷанд, 1.03.2015. (АМИТ «Ховар», Абдуаҳад Шарифзода). — Дар маркази вилояти Суғд-шаҳри Хуҷанд ҷараёни интихобот дар ҳамаи участкаҳои интихоботӣ дар сатҳи баланд ҷараён дорад.
Тавре ки ба хабарнигори  АМИТ “Ховар”  роҳбари маркази матбуоти раиси шаҳри Хуҷанд Маҳмудҷон Дадобоев иттилоъ дод, субҳи барвақт раиси шаҳри Хуҷанд Раҷаббой Аҳмадзода ба участкаи интихоботии №24, ки дар мактаби таҳсилоти умумии № 5 ҷойгир аст, омада, раъйи худро ба номзадҳои мақомоти намояндагии маҳаллӣ ва марказӣ дод.
Ба гуфти манбаъ, баҳри баргузории интихоботи парлумонӣ дар шаҳри Хуҷанд 40 ҳавза ва 64 участкаи интихоботӣ ташкил карда шудаанд,  ки дар умум дар раванди баргузории чорабинии мазкур сокинони Хуҷандшаҳр  ба Маҷлиси намояндагони Маҷлиси Олӣ  1 нафарро,  барои маҷлиси вилоятӣ   7 нафарро  ва ба маҷлиси шаҳрӣ   40 нафарро интихоб хоҳанд кард. 
То зӯҳри имрӯз аз шумораи умуми иштирокдорон  ки 98 ҳазору 720 нафарро дар бар мегиранд, 79,91% ё ин ки 78 ҳазору 885 нафар райдиҳандагон овоз додаанд.
“Аз шумораи умумии иштирокдорон 1922 нафар бори аввал дар интихобот иштирок доранд” – илова намуд манбаъ.