Муҳокимаи масъалаи конфронси сатҳи баланд

Душанбе, 31.03.2015. (АМИТ «Ховар»,  Маҳмадулло  Пириев).- Чанде  пеш  дар  шаҳри  Ню — Йорк ҷаласаи  дуюми Кумитаи  роҳбарикунандаи Конфронси  байналмилалии  сатҳи баланд   аз рӯи  натоиҷи  татбиқи  Даҳсолаи  байналмилалии  фаъолияти «Об барои  ҳаёт»  баргузор гардид. 
Назар  ба  иттилои  сомонаи  расмии Конфронси  байналмилалии   сатҳи баланд,  вазири  корҳои  хориҷии  Тоҷикистон  Сироҷиддин  Аслов дар  оғози  ҷаласа  зимни  суханони табрикотиаш  изҳор  дошт, ки  конфронси пешорӯи  Душанбе  чорабинии  асосие барои  таҳлили  муфассали  раванди татбиқи  Даҳсолаи  байналмилалии «Об барои  ҳаёт»  хоҳад  буд. 
Дар  ҷараёни  мубоҳиса, ки  таҳти роҳбарии  муовини  аввали  вазири энергетика ва  захираҳои оби Ҷумҳурии  Тоҷикистон Султон  Раҳимзода  сурат  гирифт,  аъзои Кумитаи  роҳбарикунандаи  байналмилалӣ,  намояндагони  кишварҳои мушорик, ниҳодҳои  байналмилалию  минтақавӣ,  созмонҳои  ҳавзаҳои об, ҷомеаи шаҳрвандӣ,  бахши  инфиродӣ ва  ҷонибҳои  дигари  манфиатдор перомуни  сохтору  барномаи   конфронс, тарҳрезӣ ва  мутобиқати  ҳуҷҷатҳои  ниҳоӣ ва  масоили  дигари  ташкили  ин  чорабинӣ мубодилаи  афкор  намуданд.
Ёдовар  мешавем, ки  Конфронси  байналмилалии сатҳи  баланд  моҳи  июни  соли  2015  дар  шаҳри  Душанбе баргузор  мегардад.