Мулоқоти ҳайати корӣ дар ВМКБ

Душанбе, 11.03.15. (АМИТ ”Ховар”, Некрӯзи Муҳаммадсодиқ)- Дар асоси нақшаи чорабиниҳои дастгоҳи иҷроияи Президенти Ҷумҳурии Тоҷикистон мулоқотҳои ҳайати гурӯҳи корӣ иборат аз намояндагони вазоратҳои меҳнат, муҳоҷират ва шуғли аҳолӣ, корҳои дохилӣ, кумитаҳои ҷавонон, варзиш ва сайеҳӣ, оид ба корҳои дин, танзими анъана ва ҷашну маросимҳои миллӣ ва кор бо занон ва оилаи кишвар дар шаҳру навоҳии Вилояти Мухтори Кӯҳистони Бадахшон бо сокинон идома доранд. 
Дирӯз дар ноҳияҳои Дарвоз ва Ванҷи вилояти мазкур зимни чунин як мулоқот муовини раиси Кумитаи ҷавонон, варзиш ва сайёҳӣ Мавсума Муинӣ бештар ба масъалаи ҷавонон дахл намуда, аз дастгирию ғамхории пайвастаи роҳбарияти кишвар нисбат ба ҷавонон ёдовар гардид. 
Дар мулоқотҳо сокинон атрофи муҳоҷирати меҳнатӣ, никоҳи хешу таборӣ ва дигар масъалаҳои мавриди таваҷҷуҳ ба намояндагони масъул суол дода, ҷавобҳои мушаххас гирифтанд.
Дар ин бора мутахассиси пешбари бахши иттилоотию таҳлилии Кумитаи ҷавонон, варзиш ва сайёҳӣ Наврӯз Қурбонов ба АМИТ “Ховар ” иттилоъ дод.