Мулоқоти Аҳтам Абдуллозода бо Толиб Рифоӣ

Душанбе, 11.03.15. (АМИТ “Ховар”, Некрӯзи Муҳаммадсодиқ)- Дар доираи Намоишгоҳи калонтарини дунё“ITB –Берлин” дар шаҳри Берлин ҷаласаи вазирони туризми давлатҳои масири Шоҳрохи бузурги Абрешим баргузор шуд. Зимни он раиси Кумитаи ҷавонон, варзиш ва сайёҳӣ Аҳтам Абдуллозода бо Котиби генералии Созмони умумиҷаҳонии туристӣ Толиб Рифоӣ мулоқот намуд. 
Дар мулоқот ҷонибҳо масоили ҳамкориҳои дуҷонибаи Тоҷикистон бо Созмони умумиҷаҳонии туристро мавриди баррасӣ қарор доданд. Толиб Рифоӣ ҳангоми мулоқот бештар ба соҳаи сайёҳии Тоҷикистон таваҷҷуҳ намуда, онро ояндадор арзёбӣ кард. Аҳтам Абдуллозода раиси ин созмони бонуфузро барои иштирок дар Конфронси байналмилалии туристӣ ва Фестивали фарҳангиву сайёҳии Мероси шоҳроҳи бузурги Абрешим, ки баргузории он соли ҷорӣ дар Тоҷикистон ба нақша гирифта шудааст, даъват намуд. Дар навбати худ Толиб Рифоӣ ин даъватро ба хушнудӣ пазируфт.  
Дар ин бора мутахассиси пешбари Бахши иттилоотию таҳлилии
Кумитаи ҷавонон, варзиш ва сайёҳӣ Наврӯз Қурбонов ба хабарнигори АМИТ “Ховар” иттилоъ дод.