Мулоқоти Сироҷиддин Аслов бо Пан Ги Мун

Душанбе, 27.03.2015 (АМИТ «Ховар»).- 26 марти соли 2015 дар қароргоҳи СММ мулоқоти вазири корҳои хориҷии Ҷумҳурии Тоҷикистон Сироҷидин Аслов бо Дабири кулли СММ Пан Ги Мун доир гардид.
Зимни мулоқот ҷонибҳо масъалаҳои умдаи ҳамкорӣ миёни Ҷумҳурии Тоҷикистон ва Созмони Милали Муттаҳид, аз ҷумла дар соҳаҳои рушди иқтисодиву иҷтимоии кишвар ва мусоидати СММ дар ин раванд, инчунин ширкат ва саҳми Тоҷикистонро дар муҳокимаву гуфтушунидҳо роҷеъ ба ҳадафҳои рушди устувор мавриди баррасӣ қарор доданд.
Вазири корҳои хориҷии Тоҷикистон Дабири кулли созмонро бо раванди тадорукотии Конфронси байналмилалии сатҳи баланд роҷеъ ба татбиқи Даҳсолаи байналмилалии амал “Об барои ҳаёт”, 2005-2015, ки 9-11 июни соли ҷорӣ дар Душанбе баргузор мегардад, шинос намуда, аз сохторҳои дахлдори СММ ҷиҳати ширкати фаъолона дар чорабинии мазкур даъват ба амал овард.