Мусобиқаи идонаи оташнишонон

Душанбе, 18.03.2015. (АМИТ «Ховар», Муқаддас Темурзода).-Ҳафтаи равон дар варзишгоҳи машқи таълимии Раёсати Хадамоти давлатии оташнишонии шаҳри Душанбе бахшида ба Иди байналмилалии Наврӯз ва 70-умин солгарди «Ғалаба дар Ҷанги Бузурги Ватанӣ» мусобиқаи Сарраёсати Хадамоти давлатии оташнишонии Вазорати корҳои дохилӣ оид ба бозии волейбол дар байни ҷузъу томҳои Хадамоти давлатии оташнишонии гарнизони Душанбе баргузор гардид. Дар чорабинии варзишӣ 16 даста  маҳорати баланди варзишӣ нишон дода, сазовори ҷойҳои ифтихорӣ гардиданд.
Тибқи иттилои ВКД ҶТ, ҷойи якумро Хадамоти оташнишонӣ оид ба муҳофизати неругоҳи барқи обии Роғун, ҷойи дуюмро Хадамоти оташнишонӣ оид ба муҳофизати ноҳияи Сино-1-и пойтахт ва ҷойи сеюмро Хадамоти оташнишонӣ оид ба муҳофизати шаҳри Ваҳдат ишғол намуданд.  
Ғайр аз ин ғолибон ва иштирокчиёни мусобиқа бо «Ифтихорнома» ва туҳфаҳои хотиравӣ сарфароз гардиданд.