Намоиши молҳои истеҳсоли Ҳиндустон дар Хатлон

Душанбе, 28.03.2015. (АМИТ «Ховар», Мавҷуда Анварӣ).-Аз 19-ум то 25-уми марти соли равон дар «Кохи Ватан»-и шаҳри Қӯрғонтеппа молҳои истеҳсолкардаи мардуми Ҳиндустон ба намоиш гузошта шуданд. Дар намоишгоҳи мазкур либос, маҳсулоти заргарию сангҳои қимматбаҳо, чой, атру собунҳои хушбӯй ва дигар молҳои ниёзи мардум пешкаши дӯстдорони маҳсулоти ҳиндӣ гардиданд. 
Ҳунармандони Ҳиндустону Тоҷикистон таҳти зарби доираву навои карнай ва рақси дилфиреби ҳиндиёнаю тоҷикона мардумро ба тамошои намоишгоҳ даъват намуданд.
Раҷабалӣ Раҷабов, муовини раиси вилоят зикр намуд, ки: «Маҳз ташкили чунин намоишгоҳҳои муштарак шароити мусоид фароҳам меорад, ки додугирифти мо бо ин давлати дӯст дар ҳамаи соҳаҳои хоҷагии халқ равнақ ёбад».
Қудратулло Олимов, директори кулли Палатаи савдо ва саноати вилоят, гуфт, ки ҳадафи намоишгоҳи мазкур ҷалби сармоя, ба кор даровардани корхонаҳои истеҳсолии муштарак бо истифода аз технологияи муосири инноватсионӣ тавассути коркарди ашёи хоми ватанӣ бо истеҳсоли маҳсулоти ба содирот нигаронидашуда, ташкили ҷойҳои нави корӣ ва таҳкими робитаҳои тиҷоратию иқтисодии доираҳои соҳибкорони Тоҷикистону Ҳиндустон мебошад.