Супориши Президент ба зиёиёни кишвар

Душанбе,  20.03.2015. (АМИТ «Ховар», Муқаддас Темурзода).-«Равшанфикрони мо вазифадоранд, ки барои шарҳи нуктаҳои Паём саъю талоши бештар намуда, ҷиҳати рушди Тоҷикистони азиз, пойдории суботи сиёсӣ, таҳкими рукнҳои давлатдорӣ ва таблиғи ғояҳои миллӣ кӯшиш намоянд»,-зикр намуд Президенти Ҷумҳурии Тоҷикистон Эмомалӣ Раҳмон 19 март зимни суханронии хеш дар мулоқот бо зиёиёни мамлакат.
Сарвари Давлат ҳамчунин изҳор дошт, ки пеш аз ҳама, ба омӯзгорон такя намуда, вазифаи онҳоро ба сифати равшанфикрони пешқадам дар дуруст ва самаранок ба роҳ мондани таълиму тарбияи насли наврас ва ҷавонон мебинем. Онҳо вазифадоранд, ки наслҳои ояндаро дар рӯҳияи худогоҳиву худшиносӣ, ватандӯстиву меҳанпарастӣ, заҳматдӯстиву ҳимматбаландӣ, ҳифзи манфиатҳои миллӣ, таҳкиму пойдории забони давлатӣ ва арҷгузорӣ ба арзишҳои миллӣ тарбия намоянд.
«Махсусан, зарур аст, ки мақомоти иҷроияи маҳаллии ҳокимияти давлатӣ бо такя ба омӯзгорони деҳот барои баланд бардоштани мақоми зиёиёни деҳот аз ҳисоби омӯзгорон, кормандони соҳаи фарҳанг, табибон ва дигар табақаҳои иҷтимоӣ тадбирҳои зарурӣ андешанд»,-гуфт Эмомалӣ Раҳмон.