Таҷлили Наврӯз бо иштироки адибон

Душанбе, 23.03.2015. (АМИТ «Ховар», Мавҷуда Анварӣ). -20 марти соли ҷорӣ дар сарҳади маркази вилояти Суғд зиёда аз 200 нафар меҳмони чорабиниҳои наврӯзиро бо тантана ва шукӯҳу шаҳомати хосса раиси шаҳри Хуҷанд Раҷаббой Аҳмадзода гарму самимӣ истиқбол намуд.
Баъди қабули расмӣ меҳмононро ба таҷлили Наврӯзи маҳаллаи «Сари баландӣ» даъват намуданд. Дар маҳаллаи мазкур аз ҷониби бошандагони маҳалла дастурхони наврӯзӣ бо таомҳои миллӣ ороста шуда, иштирокдорони чорабиниро бо анъанаҳои мардумии маҳал ошно намуданд. Дар баробари ин раиси шаҳри Хуҷанд дар якҷоягӣ бо меҳмонони Наврӯзи Хуҷанд дар расми ба истифода додани бинои истиқоматии баландошёнаи 16 ҳуҷрагӣ, ки ошёнаи якуми он аз чойхонаи маҳалла иборат хоҳад буд, ширкат намуданд.
Ҳозирон баъди тамошои растаҳои наврӯзӣ меҳмони омӯзгорон ва донишҷӯёни Колеҷи тиббӣ шуданд. Дар ин макони дониш низ бо қувваи муҳассилину устодон, тамоми намуди ҳунарҳои миллӣ, барномаи консертӣ баргузор гардид. Баробари таҷлили Наврӯз дар муассисаи таълимии мазкур хатнатӯйи се нафар кӯдак аз оилаи ниёзманд доир  шуд, ки раиси шаҳри Хуҷанд Раҷаббой Аҳмадзода бо адибони маъруф Меҳмон Бахтӣ, Мӯъмин Қаноат ва Бозор Собир туҳфаҳои Мақомоти иҷроияи ҳокимияти давлатии шаҳри Хуҷандро супорид.