Таҷлили Рӯзи Модар дар ДДХ

Душанбе, 10.03.2015. (АМИТ «Ховар», Раъно Нусратуллозода).-Дар Театри мусиқӣ-мазҳакавии ба номи Камоли Хуҷандӣ бо иштироки устодон ва донишҷӯёни Донишгоҳи давлатии Хуҷанд (ДДХ) ба номи академик Бобоҷон Ғафуров ба муносибати Рӯзи модар чорабинии тантанавӣ доир гардид. 
Ректори доншгоҳ Анвар Мақсудов кулли духтарон, занон ва бонувони донишгоҳро табрик намуда, афзуд, ки  аз ҳастии пайкари бузурги модар ба дили кас қуввату мадор, тавоноиву қарор ва меҳру муҳаббати беканор пайдо мегардад. Модарон беҳтарин пушту паноҳ, арзандатарин ҳастии ҳаёт, равшанидиҳандаи ҳар як хонадонанд.
Ҷоиз ба таъкид аст, ки имрӯз дар Донишгоҳи давлатии Хуҷанд ба номи академик Бобоҷон Ғафуров аз ҳисоби занҳои фаъолу кордон 1 нафар ноиби ректор,  7 нафар сардор ва мудирони шуъбаҳои Раёсати донишгоҳ, 4 нафар декани факултаҳо, 20 нафар ҷонишини декан, 27 нафар мудири кафедра дар вазифаҳои роҳбарикунанда фаъолият дорад. Гузашта аз ин аз миёни 15 ҳазор донишҷӯ наздик ба 10 ҳазор нафарашро духтар ташкил медиҳад.