Варзоб: вохӯрӣ оид самтҳои фаъолияти ХМ

Душанбе, 11.03.2015.( АМИТ «Ховар», Лайло Тоирӣ).-Дар асоси нақшаи чорабиниҳои Хадамоти муҳоҷирати Вазорати меҳнат, муҳоҷират ва шуғли аҳолии ҶТ ҷиҳати расонидани ёрии методӣ ва кумакҳои амалӣ ба сохторҳои ХМ дар шаҳру ноҳияҳо аз 2 то 6 марти соли равон, гурўҳи кории кормандони дастгоҳи марказии ХМ зери роҳбарии мудири бахши кадрҳо Қурбоналӣ Маҳмадов ба ноҳияи Варзоб сафар намуд. 
Дар ҷараёни вохўрӣ доир ба фаъолияти бахш дар ноҳияи Варзоб аз наздик шинос шуда, тарзи корбарии ҳуҷҷатгузорӣ ва дигар самтҳои фаъолияти ХМ дар ноҳия суҳбат ороста шуд.
Бино ба иттилои мутахассиси пешбари бахши ХМ дар ноҳияи Варзоб Орифҷон Бобоев иброз дошт: «Дар давоми моҳҳои январ ва феврали соли 2015 -1586 нафар сокини ноҳия ба муҳоҷирати меҳнатӣ, бахусус Федератсияи Русия сафар намудаанд, ки аз ин теъдод 145 нафарашонро занҳо ва 1 441 нафарашонро мардон ташкил медиҳанд. Дар ин муддат аз хориҷа ба ватан 1 209 нафар шаҳрванд баргашт, ки 115 нафари онро занон ташкил медиҳанд». 
Аз тарафи гурўҳи корӣ ёрии амалӣ-методӣ, ташкили кор, тарзи корбарӣ бо ҳуҷҷатҳо, банақшагирӣ, омода намудани ҳисобот, пешниҳоди саривақтии ҳисоботҳо, буклетҳо, инчунин доир ба қонунгузории нави ФР дар самти муҳоҷирати меҳнатӣ ва дигар маълумотҳо кумак расонида шуд. 
Пешниҳод гардид, ки дар маркази ноҳия то ҷашнгирии Наврўз  бо роҳбарият ва фаъолони ноҳия, раисони ҷамоат, маҳаллаҳо ва муҳоҷирони меҳнатӣ вохўрӣ бо роҳбарияти Хадамоти муҳоҷират гузаронида шавад.