Ҷаласаи Кумитаи интизоми ФФТ доир шуд

Душанбе,24.04.2015. (АМИТ ”Ховар”, Рафоати Абдулҳамид).- 23- юми апрел дар конфронс- толори Федератсияи футболи мамлакат ҷаласаи Кумитаи интизомӣ таҳти раёсати раиси кумита Тоҳир Нуров доир шуд. 
Тавре ки Федератсияи футболи Тоҷикистон хабар додааст, барои риоя накардани банди 26- и боби 7- и Кодекси интизоми ФФТ, ки қасдан дағалона бозӣ карданро баён мекунад, бозингари дастаи «Парвоз» Дилшод Додобоев дар бозии чемпионати Тоҷикистон байни дастаҳои лигаи олӣ «Парвоз» — «Хуҷанд» (18- уми апрел), дар ҳаҷми 300 сомонӣ ҷарима баста шуда, аз ҳуқуқи иштирок  дар ду бозии навбатӣ маҳрум мешавад.
Барои риоя накардани банди 21- и боби 7- и Кодекси интизоми ФФТ, ки рафтори бадқасдонаро баён мекунад, бозингари дастаи «Регар- ТадАз» Музаффар Сироҷиддинов дар бозии чемпионати Тоҷикистон байни дастаҳои лигаи олӣ «Регар-ТадАз» — «Равшан» (11- уми апрел), ба маблағи 200 сомонӣ ҷарима шуда, аз ҳуқуқи иштирок кардан дар ду бозии навбатӣ маҳрум карда шавад. Барои риоя накардани банди 3- и боби 7- и Кодекси интизоми ФФТ, ки дар як бозӣ ду маротиба бо корти зард огоҳонида шуданро баён мекунад, бозигари дастаи «Вахш»-Қӯрғонтеппа Эҳсони Панҷшанбе дар бозии чемпионати Тоҷикистон байни дастаҳои лигаи олӣ КМВА «Помир» — «Вахш» (11- уми апрел), ба маблағи 300 сомонӣ ҷарима шуда, аз ҳуқуқи иштирок кардан дар як бозии навбатӣ маҳрум карда шавад.
Барои риоя накардани банди 16- и боби 7- и Кодекси интизоми ФФТ, ки дар бозӣ барои фоли «умеди охирон» бо корти сурх огоҳонида шуданро баён мекунад, бозингари дастаи «Хуҷанд» Ардашер Неъматов дар бозии чемпионати Тоҷикистон байни ҳайатҳои ҷавонони дастаҳои лигаи олӣ «Истиқлол» — «Хуҷанд» (8- уми апрел) аз ҳуқуқи иштирок кардан дар як бозии навбатӣ маҳрум карда шавад.
Барои риоя накардани банди 32- и боби 7- и Кодекси интизоми ФФТ, ки кӯшиши бо даст зарба задани сардовари бозиро баён мекунад, бозингари дастаи «Хуҷанд» Шероз Рустамзода дар бозии чемпионати Тоҷикистон байни ҳайатҳои ҷавонони дастаҳои лигаи олӣ «Парвоз» — «Хуҷанд» (17- уми апрел) аз ҳуқуқи иштирок кардан дар чор бозии навбатӣ маҳрум карда шавад.
Барои риоя накардани банди 20- и боби 7- и Кодекси интизоми ФФТ, ки бо суханони қабеҳ таҳқири ёвари сардовари бозиро баён мекунад, бозингари дастаи «Парвоз» Аслан Ҷабборов дар бозии чемпионати Тоҷикистон байни ҳайатҳои ҷавонони дастаҳои лигаи олӣ «Парвоз» — «Хуҷанд» (17- уми апрел) аз ҳуқуқи иштирок кардан дар ду бозии навбатӣ маҳрум карда шавад.