Дарёфти сементи қирғизӣ бидуни назорати гумрукӣ

Душанбе, 29.04.2015. (АМИТ «Ховар», Муқаддас Темурзода).-Ҳангоми гузаронидани амалиёти гумрукӣ аз тарафи кормандони Раёсати минтақавии гумрукӣ дар вилояти Суғд аз ду анбори хоҷагии деҳқонии деҳаи Овчӣ-Қалъачаи ноҳияи Бобоҷон Ғафуров сементи истеҳсоли Ҷумҳурии Қирғизистон ба миқдори умумии 572 900 кг дарёфт гардид, ки арзиши он 538 ҳазору 526 сомониро ташкил медиҳад.
Тибқи иттилои Хадамоти гумрук, моли мазкур ба шаҳрванд Дилшодҷон Қодиров, соли таваллудаш 1984, истиқоматкунандаи ноҳияи Бобоҷон Ғафуров тааллуқ дошта, ин миқдор молро аз Ҷумҳурии Қирғизистон ба қаламрави гумрукии Ҷумҳурии Тоҷикистон бо роҳҳои ғайрирасмӣ бидуни назорати гумрукӣ ворид намудааст. 
Нисбат ба шаҳрванд Д. Қодиров парвандаи ҷиноятӣ бо моддаи 289 қ.1 КҶ ҶТ (яъне аз сарҳади гумрукии Ҷумҳурии Тоҷикистон гузаронидани мол ё дигар ашёҳо бо миқдори калон, бидуни назорати гумрукӣ ё пинҳонӣ аз назорати гумрукӣ) оғоз гардида, тафтиш идома дорад.