Даъвати М. Убайдулоев аз дипломати бритонӣ

 
Душанбе, 29.04.2015.(АМИТ «Ховар», Марзия Саидзода).- Раиси Маҷлиси миллии Маҷлиси Олии ҷумҳурӣ Маҳмадсаид Убайдуллоев хостори ифтитоҳи филиали донишгоҳҳои олӣ ва литсейҳои бритонӣ дар Тоҷикистон шудааст. Мавсуф зимни мулоқот бо сафири тозатаъйини Британияи Кабир дар Тоҷикистон Хю Стэнли Филпотт масоили мубрами таҳкими равобити Душанбе ва Лондон дар бахшҳои мухталиф, назири густариши ҳамкориҳои парлумонӣ, иқтисодию гуманитариро матраҳ намуд.
Бахусус мусоҳибон атрофи ҷалби бештари бахши иқтисод ва тиҷорати Британияи Кабир дар лоиҳаҳои инвеститсионии Тоҷикистон, зиёд намудани шумораи корхонаҳои муштарак, квотаҳои мавҷуда барои донишҷӯёни тоҷик дар мактабҳои олии Британияи Кабир -Оксфорд, Кембриҷ, Мактаби тиҷоратии Лондон, кушодани филиали донишгоҳҳои олӣ ва инчунин таъсиси литсейҳои бритонӣ дар Тоҷикистон табодули назар карданд. Зикр шуд, ки дар Тоҷикистон барои тақвияти равобити иқтисодӣ тамоми заминаҳои ҳуқуқӣ фароҳам оварда шудааст. М. Убайдуллоев зикр кард, ки мувофиқи мақсад мебуд агар ҷониби Ҳукумати Британияи Кабир ҷараёни ба имзо расонидани созишномаҳои байниҳукуматиро оид ба ҳамкориҳои иқтисодию илмӣ-техникӣ, қадргардонӣ ва ҳимояи дуҷонибаи сармоя, худдорӣ намудан аз андозбандии дукарата ва пешгирии канораҷӯӣ аз пардохти андозҳо аз даромад ва сармоя, ки аз ҷониби Тоҷикистон пешниҳод шудааст, тезонад.
     Ҳамзамон мусоҳибон доир ба ҷилавгирӣ аз баъзе зуҳуроти номатлуби замони муосир-  терроризм, экстремизм, гардиши ғайриқонунии маводи мухаддир ва соири ҷиноятҳои муташаккилона, инчунин авзои минтақа, бахусус Афғонистон табодули афкор намуданд.