“Фестивали гулҳо” дар Хуҷанд

Хуҷанд, 21.04.2015. (АМИТ “Ховар”, Абдуаҳад Шарифзода).-Дар маркази шимоли кишвар баргузории фестивали гулҳо дар назар аст. Тавре ки ба АМИТ “Ховар” роҳбари маркази матбуоти мақомоти шаҳр Маҳмудҷон Муҳаммадӣ  иттилоъ дод, мақсад аз эълон гаштани озмуни мазкур- ин пеш аз ҳама таъмини иҷрои қарори раиси вилояти Суғд Абдураҳмон Қодирӣ бобати эълони «Соли 2015-соли гулҳо» ва дар ин замина вусъат бахшидан ба корҳои ободонии муҳити зист, аз ҷумла симои маҳаллаҳову саҳни биноҳои истиқоматии ташкилоту муассисаҳо, тарғибу ташвиқи ҳисси зебоипарастӣ ва бедор намудани завқи аҳолӣ нисбат ба ободонии шаҳр ба ҳисоб меравад.       Ба гуфти манбаъ, озмун-фестивал дар арафаи таҷлили Рӯзи Истиқлолияти давлатии Ҷумҳурии Тоҷикистон ҷамъбаст мегардад. Вобаста ба иҷрои шартҳои озмун барои ғолиби ҷои аввал мукофотпулӣ дар ҳаҷми 5000 сомонӣ, барои ҷои дуввум- 3000 сомонӣ ва барои ҷои сеюм — 2000 сомонӣ пешбинӣ шуда, инчунин иштирокдорон бо Диплом ва туҳфаҳои хотиравии мақомоти шаҳр сарфароз гардонида мешаванд.