Хуҷанд: Гусели аввалин ҷавонони ихтиёрӣ ба хизмат

Душанбе, 3.04.2015. (АМИТ «Ховар», Мавҷуда Анварӣ).-  Дар майдони муҷассамаи Исмоили Сомонии  шаҳри Хуҷанд ба муносибати гусели аввалин ҷавонони синни даъватӣ, ки ихтиёран ба сафи Қувваҳои мусаллаҳи Ҷумҳурии Тоҷикистон худро номнавис кардаанд, ҳамоиши ботантана баргузор гардид.
Дар оғози чорабинӣ раиси шаҳри Хуҷанд Раҷаббой Аҳмадзода ба ҷавонписарон-сарбозон муроҷиат намуда, таъкид намуд: «Итминони комил дорам, ки ҷавонони мо чун сарбозони шуҷоъ дар сафи Қувваҳои мусаллаҳи давлати соҳибистиқлоламон ба савганди ҳарбии худ содиқ монда, рисолат ва ӯҳдадориҳои ҳарбии худро дар назди Ватан — Модар бо сарбаландӣ иҷро менамоянд».
дар чорабинӣ раиси Шӯрои собиқадорони ҷангу меҳнати шаҳр Ҳошимҷон Осимов ва модари даъватшуда Гулнора Ҳотамова суханронӣ намуданд.
Ҷавони даъватшуда Санъат Убайдуллоев дар назди ҳозирон ваъда дод, ки онҳо бо сари баланд хизмати модар-ватанро ба ҷо оварда, барои ҳимояи манфиатҳои кишвари худ вазифаҳои дар наздашон гузоштаро сари вақт ба ҷо хоҳанд овард.
Дар анҷом аз ҷониби ҳунармандони бахши фарҳанг барномаи консертӣ манзури ҳозирон гардид.