Истиқболи «Фалак» аз ҷашнвораҳои Кӯлоб

Душанбе,21.04.2015. (АМИТ «Ховар», Мавҷуда Анварӣ).-Дар чаҳорчӯби истиқболи ҷашнвораи 700- солагии Мир Сайид Алии Ҳамадонӣ,  Пойтахти фарҳангии ИДМ интихоб шудани шаҳри Кӯлоб дар соли 2015 ва 70-солагии Донишгоҳи давлатии Кӯлоб дар шаҳри Кӯлоб ҳамарӯза чорабиниҳои мухталиф баргузор мегарданд. Ба ин хотир, рӯзҳои истироҳатии ҳар ҳафта дар боғи фарҳанг ва истироҳати шаҳр бо ширкати гурӯҳҳои ҳунарӣ барномаҳои фарҳангӣ доир мешаванд. 
Ҳафтаи қаблӣ ансамбли «Фалак» бо роҳбарии ҳунарманди мардумии Тоҷикистон Сурайё Қосимова ба сокинон ва меҳмонони шаҳр як барномаи хуби ҳунариро пешкаш намуд. Мутобиқ ба нақшаи таҳияшуда дар радифи идораи фарҳанг ва хонаҳои маданият, ҳамчунин тамоми гурӯҳҳои ҳунарии шаҳр ва деҳот ба ин чорабинӣ ҷалб шуда, то рӯзи баргузории ҷашнвораҳо барномаҳои ҳунарии худро пешкаши мардум хоҳанд кард.