Кӯлоб: Маҷлиси машваратӣ оид ба рушди саноат

 
Кӯлоб,16.04.2015 (АМИТ «Ховар» Фарҳод Мадаминов).-Дар маҷлисгоҳи ҳукумати шаҳри Кӯлоб бо иштироки муовини Сарвазири Ҷумҳурии Тоҷикистон Азим Иброҳим, муовини вазири кишоварзии ҶТ Ҷамила Саидова, муовини вазири рушди иқтисод ва савдои ҶТ Гулрӯ Қаюмова, раиси шаҳри Кӯлоб Амонулло Хайрулло, муовинони раис, сардорони шуъбаҳои мақомоти ҳукумати шаҳр, соҳибкорон, роҳбарони ташкилоту муассисаҳои шаҳрӣ ва минтақавӣ маҷлиси машваратӣ баргузор гардид.
Мақсади ҷаласа пайдо намудани роҳҳои рушди саноат дар шаҳри Кӯлоб ва минтақаи Кӯлоб буд. Дар машварат муовини Сарвазири ҷумҳурӣ Азим Иброҳим иброз намуд, ки ҳар сол Сарвари давлат дар Паёми хеш ба Маҷлиси Олӣ оид ба рушди бештари саноат  супориш медиҳад. Ин дастур барои як соли пешомада ва ҳафт соли оянда нигаронида шудааст. Мо  бояд дар ин самт рушди иқтисодиро баланд бардошта, ба соҳибкорӣ бештар рӯ орем. Аз маълумотҳо бармеояд, ки мо 82% маҳсулотҳоро аз хориҷи кишвар ворид менамоем. Барои бо маҳсулотҳои худӣ таъмин намудан ва таъсис додани ҷойҳои нави корӣ бояд тадбирҳои дақиқ андешем. 
Дар машварат таъкид гардид, ки соли гузашта аз ҳисоби Фонди дастгирии соҳибкорӣ ба муҳлати 2 сол ба 103 соҳибкор 63 миллион сомонӣ маблағ ҷудо гардид ва дар ин самт марҳила ба марҳила баҳри рушди соҳибкорӣ, бахусус бахши саноат аз ҳисоби фонд маблағҳо ҷудо  мешаванд. Ин нишондиҳанда дар соли 2015 дар ҳаҷми 70 миллион сомонӣ пешбинӣ шудааст.