Мексика: 900 килограм маъдан рабуда шуд

   Душанбе,09.04.2015. (АМИТ «Ховар».-Иброҳими Ҳабибуллоҳ).- Мувофиқи гузориши  котиби генералии штати Синалоаи Мексика Херардо Варгас аз ҷониби шахсони номуълум аз кони канданиҳои фоиданоки ширкати «Мак Ивен Майнинг» мансуб ба Канада дар ҳаҷми  900 килограмм маъдан рабуда шудааст, ки аз он 7 ҳазор унси тиллои холис гирифтан имконпазир буд. Миқдори маблағи он 8,5 миллион долларро ташкил медод. Ба гуфти масъулини ширкат ин ҳодиса дар нақби кони канданиҳои фоиданоки Мокоритои Канада рух додааст. Гуфтан бамаврид аст, ки ҳукуматдорони Мексика ҷинояткоронро  дар ҳамдастӣ бо кормандони ширкати «Мак Ивен Майнинг» гумонбар меҳисобанд. 
 
     Душанбе,09.04.2015. (АМИТ «Ховар»).-Шаби  гузашта дар фурудгоҳи шаҳри Детройти штати Мичигани Иёлоти Муттаҳидаи Амрико  ҳавопаймои мусофирбар мансуб ба ширкати «Делта Эйр Лайнс» ба терминали фурудгоҳ бархӯрд. Бар асари бархӯрд ба бино як қисми тайёра осеб дид. Гуфта мешавад, ки дар пайи ин ҳодиса ягон нафар  мусофир зарар надидааст. 
 
     Душанбе,09.04.2015. (АМИТ «Ховар»).-Бегоҳи гузашта дар қисми ҷанубии Ҷумҳурии Исломии Покистон миёни низомиёни Артиши миллии кишвар ва ҷангиёни ҳаракати «Толибон» даргирии шадид ба амал омад. Бар асари бархӯрди ҷонибҳо 6 нафар силоҳбадаст маҳв  шуд. Дар байни ҳалокгардидагон як нафар аз саркардагони ҳаракати «Толибон» низ ҳаст. Низомиёни кишвар аз макони бархӯрд ба миқдори зиёд силоҳ ва муҳимоти ҷангӣ дарёфт ва мусодира намуданд.
 
     Душанбе,09.04.2015. (АМИТ «Ховар»).-Дар нимҷазираи Синайи Миср як таркиши шадид  дар яке аз биноҳои истиқоматии Шайх-Зувейд ба амал омада, дар ҷои ҳодиса 11 нафар аз аҳолии осоишта ва ду низомӣ ба ҳалокат расид. Ва  6 нафари дигар бо бардоштани ҷароҳати вазнин дар беморхона  бистарӣ гардид.Табибон вазъияти беморонро вазнин арзёбӣ мекунанд. Гуфта мешавад, ки дар он лаҳза мошини ҳомили низомиён дар канори роҳ ба таҷҳизоти тарканда бархӯрдааст.