Мизи мудаввар оид ба ҳамкории милитсия бо ҷомеа

Душанбе, 30.04.2015 (АМИТ «Ховар», Фарзонаи Давлат).-Аз 27 то 29-уми апрели соли равон дар шаҳри Душанбе мизи мудаввар дар мавзӯи “Ҳамкории милитсия бо ҷомеа”таҳти сарпарастии Шуъбаи Сафорати ИМА оид ба мубориза бар зидди маводи мухаддир ва ҳифзи тартиботи ҳуқуқӣ (ШМММҲТҲ) ва Дафтари Созмони амният ва ҳамкорӣ дар Аврупо дар Тоҷикистон (САҲА) баргузор гардид, ки дар он 7 шӯрои ҷамъиятии навтаъсиси Тоҷикистон муаррифӣ шуданд. Бино ба иттилои сафорати ИМА дар Душанбе ба ҷорабинии мазкур Сафири ИМА Эллиотт Сюзан, вазири корҳои дохилӣ генерал- лейтенант Рамазон Раҳимзода ва иҷрокунандаи вазифаи роҳбари САҲА дар Тоҷикистон Шон Мак Гриви 27-уми апрел ифтитоҳ бахшиданд. Шахсони воломақом зимни суханрониашон нақши ҳамкории милитсия бо ҷомеаро муҳим арзёбӣ намуда, шӯроҳои ҷамъиятӣ бо мақсади баланд бардоштани иқтидори ВКД дар хизматрасонии он ба шаҳрвандони Тоҷикистон бо назардошти риояи ҳуқуқҳои башар, аз ҷониби Вазорати корҳои дохилӣ дар ҳамкорӣ бо пешвоёни ҷомеаи шаҳрвандӣ таъсис дода шуданд. Шӯроҳои мазкур аз намояндагони милитсия, ҳукуматҳои маҳаллӣ, ҳизбҳои сиёсӣ, сарварони ҷомеаи шаҳрвандӣ, ҳуқуқшиносон ва аъзои ҷомеа иборатанд.Дар ҷараёни чорабинии мазкур тақрибан 130 аъзои милитсия ва шӯроҳои номбаршуда аз кулли манотиқи кишвар бо стратегияи ҳамкории милитсия бо ҷомеа, густариши ҳамкорӣ, муайян намудани роҳҳои ҳалли масоили гуногун ва пешгирии ҷиноят аз наздик шинос шуданд. Миёни иштирокчиён инчунин муносибатҳои корӣ ба роҳ монда шуда, мубодилаи афкор сурат гирифт. ШМММҲТҲ ва САҲА иқдом намуданд, ки аз баланд бардоштани иқтидори шӯроҳои ҷамъиятиро баҳри саҳмгузории минбаъдаи онон зимни ислоҳоти милитсия дар оянда низ дастгирӣ намоянд.Гуфта мешавад, Ҳукумати Иёлоти Муттаҳидаи Амрико тасмим гирифтааст, ки дастгирии сохторҳои ҳифзи ҳуқуқ ва адлияи Тоҷикистонро идома дода, бо Ҳукумати Тоҷикистон дар таъмини амнияти шаҳрвандони он ҳамкорӣ хоҳад кард.