Намоишгоҳи «Тоҷикистон, Баҳор- 2015» оғоз шуд

Душанбе, 09.04.2015. (АМИТ «Ховар», Манижа Баҳромзода).-   Имрӯз  дар шаҳри  Душанбе  бо дастгирии  ҶДММ  «Тоҷ Экспо»  ва ташаббуси Палатаи савдо ва саноати Тоҷикистон сеюмин Намоишгоҳи байналмилалии саноатӣ ва тиҷоратии «Тоҷикистон, Баҳор- 2015» баргузор гардид. Дар намоишгоҳи мазкур маҳсулоти ватанӣ ва ғайриватании ширкатҳои истеҳсолӣ, аз қабили маҳсулоти хӯрокворӣ ва нӯшокӣ, обкашҳо барои об, маҳсулоти ороишӣ, яхдонҳо барои мағозаҳо, маҳсулоти сохтмон ва ороишӣ, энергетика ва саноати истихроҷи кӯҳӣ ба намоиш гузошта шуданд. 
      «Мо хоҳони ворид намудани технология ва  таҷҳизоти пешрафтаи ҷавобгӯи стандартҳои ҷаҳонӣ бо мақсади коркарди ашёи хоми маҳаллӣ ва бо ин роҳ баромадан ба бозори пешқадами ҷаҳонӣ мебошем»,-иброз дошт  Манзура Рустамова-муовини раиси Палатаи савдо ва саноати Тоҷикистон имрӯз, 9 апрел зимни ифтитоҳи намоишгоҳ. Ба гуфтаи масъулин ҳадафи асосии намоишгоҳ — ин муаррифии маҳсулоти ватанӣ ва ғайриватании молу колои  истеҳсолкунандагон, ҷалби сармоягузорони хориҷӣ ва ғанӣ гардонидани иқтисодиёти Ҷумҳурии Тоҷикистон,  ҳамзамон ба мувофиқа  расонидани ҳамкориҳои  судманд дар бахши тиҷорату иқтисод  мебошад. 
       Дар чорабинии мазкур бештар аз 20 ширкат иштирок намуд, ки онҳо ширкатҳои тоҷикистонӣ, олмонӣ, туркӣ, эронӣ, фаронсавӣ ва афғонӣ мебошанд. Ширкатҳои «Авитсенна», «Тоҷик Климат»,«Сино сервис», «Умный дом», «Поянда бетон», «Астеd», « Аrsecol» аз қабили  он ширкатҳое мебошанд, ки дар Намоишгоҳи байналмилалии саноатӣ ва тиҷоратии «Тоҷикистон, Баҳор-2015» маҳсулоти худро ба намоиш гузоштанд. 
Ёдовар мешавем, ки  намоишгоҳи мазкур  аз 9 то 12 апрел дар  МД «Кохи Борбад» аз соатҳои 10-00 то 18-00 идома меёбад.