«Роҳ ба сӯи эҷод»-роҳнамо барои эҷодкорон

Душанбе, 01.04.2015. (АМИТ «Ховар», Манижа Баҳромзода).- «Эҷод- ин омўхтан, офаридан, таҷриба  кардан, қоидаҳоро вайрон кардан, ба хатогӣ  роҳ  додан  ва оқибат аз  ҳамаи он қаноатмандӣ ёфтан аст»,-омадааст дар пешгуфтори китоби «Роҳ  ба сўи  эҷод», ки ба қалами Бахтиёри Қутбиддин-дотсенти факултети журналистикаи ДМТ тааллуқ дорад. «Роҳ ба сўи эҷод»-китоби навбатии тозанашри муаллиф буда, дар он роҷеъ ба усулҳои эҷод  кардан ва роҳҳои муваффақ шудан дар ин самт маълумот дода шудааст. 
Китоби мазкур хусусияти таълимӣ  дошта, дар он баъзе масъалаҳои ворид шудан ба фаъолияти эҷодӣ, хусусият ва мушкилоти ҷараёни он, роҳу усул ва қобилияту ҳунари навиштан аз равзанаҳои гуногун матраҳ гардидааст. «Чӣ кор кунам, ки навишта тавонам?», «Нахустқадамҳо дар навиштан», «Иштибоҳу ихтисор фоҷиа нест», «Хатарҳо дар навиштан», «Тақлиди бесамар» аз ҷумлаи мавзӯъҳое ҳастанд, ки дар  китоби «Роҳ ба сӯи эҷод» дарҷ шудаанд. Китоби мазкур ҳамчун дастури ёрирасони омўзишӣ барои донишҷўёни факултети журналистика ва завқмандони ҷавони соҳа пешниҳод гардидааст.