Спартакиадаи донишҷӯён дар Кӯлоб

Кӯлоб,18.04.2015. (АМИТ «Ховар», Сулаймони Хол).- Марҳилаи дуюми спартакиадаи донишҷӯён дар шаҳру ноҳияҳои минтақаи Кӯлоби вилояти Хатлон идома дорад. Мақсад аз баргузории спартакиада рушди варзиш миёни ҷавонону донишҷӯёни мамлакат ва мустаҳкам намудани дӯстиву рафоқат ба ҳисоб меравад.
Дар марҳилаи дуюми спартакиадаи вилоятӣ  аз рӯи зиёда аз 10 намуди варзиши даставию инфиродӣ, варзишгарон дар ҳайати 7 даста аз донишгоҳу донишкада ва коллеҷҳои шаҳрҳои Қурғонтеппаю Кӯлоб ва ноҳияи Данғара ширкат намуданд. 
Бо дастгирии бахши ҷавонон, варзиш ва сайёҳии минтақаи Кӯлоб ва раёсати донишгоҳу донишкадаҳо то имрӯз мусобиқаҳо аз намуди волейболу баскетбол байни духтарону писарон, гӯштини дзюдо ва самбою  тенниси рӯи миз гузаронида шуд, ки дар онҳо беҳтарин варзишгарон ширкат варзида, дар баробари касб намудани ҷойҳои ифтихорӣ ба марҳилаи сеюми спартакиадаи донишчӯён роҳхат пайдо намуданд. Маврид ба ёдоварист, ки дар шаҳри Кӯлоб бо иштироки донишҷӯёни  донишгоҳҳои давлатии Кӯлоб ва Қурғонтеппа, Донишкадаи технология ва менеҷменти инноватсионии Кӯлоб, Донишгоҳи давлатии Данғара ва дигар дастаҳо мусобиқаи тенниси рӯи миз баргузор гардид. Дар даври ниҳоии мусобиқа байни духтарон дастаи Донишкадаи технология ва менеҷменти инноватсионии Кӯлоб ҷои аввалро гирифта, ҷои дуюм насиби дастаи Донишгоҳи давлатии Кӯлоб ва ҷои сеюм насиби варзишгарони Донишгохи давлатии Данғара гардид. Мусобиқаи финалӣ байни дастаҳои писарона бо ғолибияти дастаи Донишгохи давлатии Кӯлоб анҷом пазируфт. 
Дар фарҷоми мусобиқа аз ҷониби дастандаркорон ба ғолибон ифтихорнома ва туҳфаҳои бахши ҷавонон, варзиш ва сайёҳии минтақаи Кӯлоб тақдим гардиданд.