Ҳуқуқҳои занонро ҳимоя менамоем

Душанбе, 30.05.2015. (АМИТ  «Ховар», Лайло Тоирӣ).-Бахшида ба Соли оила эълон гардидани соли 2015 дар Академияи Вазорати корҳои дохилии Ҷумҳурии Тоҷикистон конфронси илмӣ-назариявӣ дар мавзӯи «Мақоми зан дар ҷомеа ва танзими муносибатҳои оилавӣ дар замони муосир» баргузор гардид.
Дар конфронс намояндагони вазорату идораҳо, омӯзгорону курсантони Академияи Вазорати корҳои дохилии Ҷумҳурии Тоҷикистон, омӯзгорони Донишкадаи исломии Тоҷикистон ба номи Имом Аъзам-Абӯҳанифа бини Собит, намояндагони ташкилотҳои ҷамъиятӣ иштирок намуда, доир ба мавзӯҳои «Ҳимояи ҳуқуқи занон тибқи қонунгузории оилавии Ҷумҳурии Тоҷикистон», «Вазъи ҳуқуқ ва озодиҳои занон», «Пешгирии зӯроварӣ дар оила», «Бастани ақди никоҳ байни шаҳрвандони Ҷумҳурии Тоҷикистон ва гурезагон: таҳлили қонунгузории Тоҷикистон дар ин самт», «Нақши модар дар омӯзиш ва парвариши фарзанд», «Нақши модар дар тарбияи духтар», «Баъзе мушкилоти ҳуқуқии ақди никоҳи хешутаборӣ ва роҳҳои ҳалли он дар Ҷумҳурии Тоҷикистон» маърӯзаҳо шунида шуданд.