Баргузории “Намоишгоҳи сайёҳии Хуҷанд-2015”

Хуҷанд, 16.05.2015. (АМИТ “Ховар”, Абдуаҳад Шарифзода).-Дар маркази шаҳри Хуҷанд дар доираи таҷлили Рӯзи байналмилалии осорхонаҳо, ки ҳамасола 18 май доир мегардад, баргузории чанд чорабинӣ дар назар аст. Тавре ки омири Осорхонаи таърихии вилояти Суғд Мансур Бойматов иттилоъ дод, соли равон бори аввал дар миқёси вилоят бо ташаббуси раёсати ҷавонон, варзиш ва сайёҳии вилояти Суғд бо дастгирии мақомоти ҳокимияти давлатии вилоят бо ҳамдастии Осорхонаи таърихии вилоятӣ дар муассисаи давлатии “Маҷмааи фарҳангиву таърихии ”Қалъаи Хуҷанд” — “Намоишгоҳи сайёҳии Хуҷанд-2015” доир мегардад. Мутобиқи нақшаи чорабинӣ дар он намояндагони тамоми ширкатҳои сайёҳие, ки дар миқёси шимоли кишвар фаъолият доранд, ширкат намуда, ҳозиринро бо фаъолияту пешниҳодоти сайёҳии худ ва ҳамзамон ҷойҳои таърихиву сайёҳии вилоят ошно хоҳанд намуд. Соли саввум аст, ки 18 май бо ташаббуси маъмурияти осорхона ва дастгирии раёсати фарҳанги вилоят дар осорхона чорабинии «Шабонгоҳ дар Осорхона» доир мегардад, ки ҳадафи асосии он ҷалби бештари тамошобинон, хосатан ҷавонон ба тамошои осорхона мебошад. Соли равон маротибаи дуввум аст, ки дар назди бинои осорхона бо иштироки васеи аъзои клуби ҳаводорони мошинҳои коллексионӣ бо мақсади ошно намудани шаҳрвандон ва меҳмонон бо таърихи пайдоиши техника ва мошинҳои бароришашон аз солҳои 40 то охирҳои 80-уми қарни ХХ намоишгоҳ таҳти унвони “Хуҷанд-Ретро-Авто-2015”” гузаронида мешавад.