Баррасии мушкилоти муҳоҷирон дар ҷаласаи Х Тоҷикистону Русия

Душанбе, 14.05.2015. (АМИТ  «Ховар», Лайло Тоирӣ).-Аз 27 то 29 майи соли 2015 дар шаҳри Душанбе, ҷаласаи Х -уми Гурўҳи кории муштараки Тоҷикистону Русия оид ба амалигардонии Созишнома байни Ҳукумати Ҷумҳурии Тоҷикистон ва Ҳукумати Федератсияи Русия дар бораи фаъолияти меҳнатӣ ва ҳифзи ҳуқуқи шаҳрвандони Ҷумҳурии Тоҷикистон дар Федератсияи Русия ва шаҳрвандони Федератсияи Русия дар Ҷумҳурии Тоҷикистон аз 16 октябри соли 2004 баргузор мегардад.
Қарор аст дар ҷаласаи мазкур масъалаҳои  вазъият дар  соҳаи муҳоҷирати меҳнатӣ, лоиҳаи Созишнома оид ба ҷалби муташаккилонаи шаҳрвандони Ҷумҳурии Тоҷикистон барои амалӣ намудани фаъолияти корӣ дар ҳудуди Федератсияи Русия,  ҳамкориҳо дар соҳаи муҳоҷират, ки мубодилаи иттилоотии шахсони манъшударо дар бар мегирад,  ҷараёни кори Гурўҳи кории кормандони мақомоти тарафҳо оид ба баррасии имконоти сафари 5  табақаи шаҳрвандони Ҷумҳурии Тоҷикистон, ҳолати татбиқи вазъияти Протоколи байниҳукуматӣ аз 29 октябри соли 2013, ки иҷозати кориро барои шаҳрвандони Ҷумҳурии Тоҷикистон  ба муҳлати се сол пешбинӣ намудааст, баррасӣ шаванд.
Дар ин бора ба АМИТ «Ховар» аз шуъбаи муносибатҳои байналмилалӣ, робита бо ҷомеа  ва ҳамватанони бурунмарзии Хадамоти муҳоҷирати Вазорати меҳнат, муҳоҷират ва шуғли аҳолӣ хабар доданд.