Имтиҳонҳои эҷодӣ ва маҳорат

Душанбе, 29.05.2015. (АМИТ «Ховар», Раъно Нусратуллозода).-Маркази миллии тестӣ (ММТ)-и назди Президенти Ҷумҳурии Тоҷикистон бори дигар ба иттилои довталабоне, ки ихтисосҳои самтҳои санъат, варзиш, дизайн, меъморӣ, ҳайкалтарошӣ ва диниро, ки супоридани имтиҳонҳои эҷодӣ ва маҳоратро талаб мекунанд, интихоб намудаанд, мерасонад, ки имтиҳонҳои эҷодӣ ва маҳоратро комиссияҳои имтиҳонӣ (фаннӣ)-и муассисаҳои таълимӣ баргузор менамоянд.
Тибқи иттилои ММТ довталабон бояд пеш аз оғози имтиҳонҳои эҷодӣ ва маҳорат то 20 июни соли 2015 ба назди комиссияи қабули муассисаи таълимии интихобнамудаашон барои машварат ҳозир гардида, аз тартибу талабот ва нақшаи баргузории ин имтиҳонҳо огоҳ шаванд.
Имтиҳонҳои эҷодӣ ва маҳорат бевосита дар муассисаҳои таълимии дахлдор пеш аз имтиҳонҳои қисмҳои А (имтиҳони умумӣ) ва Б (имтиҳони ихтисос) аз 20 то 30 июн баргузор мегарданд. Тибқи тартиб  ММТ рӯйхати довталабонеро, ки бояд чунин имтиҳонҳоро супоранд, дар доираи ихтисосҳои дахлдор ба муассисаҳои таълимӣ пешниҳод менамояд ва муассисаҳои таълимӣ дар асоси рӯйхатҳои пешниҳодгардида ҷадвали баргузории имтиҳонҳои эҷодӣ ва маҳоратро тартиб дода, довталабони дахлдорро хабардор мекунанд. Рӯйхати муассисаҳои таълимие, ки ба низоми имтиҳонҳои марказонидаи дохилшавӣ шомиланд, дар сомонаи ММТ ҷой дода шудааст. Маълумоти заруриро дар бораи ин муассисаҳои таълимӣ, аз ҷумла нишонӣ ва шумораи телефонҳоро барои тамос метавонед аз рӯйхати мазкур дастрас намоед.