Иштироки паҳлавони тоҷик дар Ҷоми Аврупо

Душанбе, 08.05.2015. (АМИТ “Ховар”, Фарзонаи Давлат).- Рӯзҳои 9-ум 10-уми майи соли равон дар Ҷоми Аврупо оид ба дзюдо байни наврасони солҳои таваллудашон 1998-2000-ум, ки дар шаҳри Питешти Руминия баргузор мешавад, паҳлавони ҷавони тоҷик Хуршед Маҷидов иштирок мекунад.
Ба иттилои Кумитаи миллии олимпии кишвар Хуршед Маҷидов  дар Ҷоми Аврупо оид ба дзюдо байни наврасони солҳои таваллудаши 1998-2000-ум, ки рӯзҳои 2-3 май дар шаҳри Берлини Олмон баргузор шуд, соҳиби медали нуқра гардид.
Хуршед дар ин мусобиқа дар вазни беш аз 90 кило пас аз се ғалаба ба финал баромад, вале дар қувваозмоии ниҳоӣ аз Инал Тасоеви русиягӣ шикаст хӯрд ва барои ҷойи дувум бо медали нуқра мукофотонида шуд.
Дар мусобиқа дар ҳисоби умумидастаӣ тими мунтахаби Русия бо касби 24 медал (6 тилло, 4 нуқра ва 14 биринҷӣ) ғолиб шуд. Дастаи мунтахаби Ҷопон (5-0-2) ҷойи дуюм ва тими мунтахаби Бразилия бо гирифтани панҷ нишон (2-1-2) ҷойи сеюмро ишғол карданд. Дастаи мунтахаби Тоҷикистон бо 1 медали нуқра ва як ҷойи ҳафтум мақоми 9-умро соҳиб шуд ва аз 28 кишвар пеш гузашт.