Марафони дави миллӣ бахшида ба Рӯзи ҷавонон

Душанбе, 08.05. 2015. (АМИТ “Ховар”, Фарзонаи Давлат).- Ҷавонони ВМКБ бо ҳамроҳии ҷавонони шаҳри Кӯлоб дар ҳайати 14 нафар, вилояти Суғд дар ҳайати 7 нафар, шаҳри Турсунзодаву Қурғонтеппа ва водии Рашт низ дар ҳайати 7 нафарӣ баҳри якдилии ҷавонони ҷумҳурӣ, баланд бардоштани ҳисси ватандустӣ ва эҳтиром гузоштан ба парчами миллӣ бахшида ба Рӯзи ҷавонони Тоҷикистон таҳти унвони “Ҷавонон ҷонибдори тарзи ҳаёти солим” тасмим гирифтанд, ки аз шаҳрҳои Хоруғ, Хуҷанд, Турсунзода, Рашт, Қурғонтеппа ва Кӯлоб то Душанбе марафони давро доир намоянд.
Табқи нақша марафон аз тариқи хатсайри зерин амалӣ мегардад:
Оғоз аз шаҳри Хоруғ-Шуғнон-Рӯшон-Ванҷ-Дарвоз-Шӯрообод-Кӯлоб-Восеъ-Данғара-Норак-Ваҳдат-Душанбе дар муҳлати 8 шабонарӯз.
 Хуҷанд-Спитамен-Истаравшан-Шаҳристон-Айнӣ-Варзоб-Душанбе дар муҳлати 6 шабонарӯз.
Кӯлоб-Восеъ-Данғара-Норак-Ваҳдат-Душанбе дар муҳлати 5 шабонарӯз.
Рашт-Нуробод-Роғун-Файзобод-Ваҳдат-Душанбе дар муҳлати 5 шабонарӯз.
Турсунзода-Шаҳринав-Ҳисор-Душанбе дар муҳлати 2 шабонарӯз.
Қурғонтеппа-А.Ҷомӣ-Хуросон-Рӯдакӣ-Душанбе дар муҳлати 3 шабонарӯз.
Дар назар аст, ки иштирокчиёни марафон аз тамоми минтақаҳои ҷумҳурӣ дар Рӯзи дави миллӣ, ки 17-уми май доир мегардад, дар як вакт ба шаҳри Душанбе расида, Парчами миллиро ба иштирокчиёни дави миллӣ дар шаҳри Душанбе, ки дар маҳаллаи  «Чорбоғ» — и ноҳияи Варзоб  оғоз мегардад,  супоранд.