Поси хотири шаҳидони набард дар Хуҷанд

 
Хуҷанд, 08.05.2015. (АМИТ “Ховар”, Абдуаҳад Шарифзода).-Субҳи имрӯз  дар маркази Суғд -шаҳри Хуҷанд дар назди ёдгории шаҳидони Ҷанги дуюми ҷаҳонӣ бахшида ба 70- умин солгарди Ғалабаи халқи шӯравӣ ба фашизм танатанаи пуршукӯҳ баргузор гардид. Дар ҳамоиши идона иштирокчиёни ин набард ва меҳнаткашони ақибгоҳ, собиқадорони меҳнат бо шумораи наздик ба 200 нафар, инчунин иштирокчиёни ҷангҳои байналмилалӣ, намояндагони корпусҳои дипломатӣ дар шаҳри Хуҷанд, сарбозону афсарони гарнизони ҳарбии Суғд, сокинони маркази вилоят иштирок намуданд.                          Раиси вилояти Суғд Абдураҳмон Қодирӣ ва раиси шаҳри Хуҷанд Раҷаббой Аҳмадзода  ҳамроҳи шуҷатмандони ватан, ки дар набардҳои шадид ҷонбозиҳо намудаанд, дар лаҳзаи мутантан ба пояи ёдгории шаҳидони ин ҷанг гулчанбар гузошта, хотираи неки фарзандони диёр, ки баҳри озод намудани инсоният аз фашизми гитлерӣ қурбон гаштаанд, пос доштанд. Хотиррасон бояд кард, ки алъон дар вилояти Суғд 240 иштирокчии ҷанг, аз он 23 нафар дар шаҳри Хуҷанд умр ба сар мебаранд, ки ҳамаи онҳо дар арафаи таҷлили ҷашни мазкур бо кумакпулиҳои Президенти кишвар ва мақомоти вилоятиву шаҳрию ноҳиявӣ бархурдор гаштаанд.