Рӯзи байналмиллалии муҳофизати кӯдакон дар Хатлон

Душанбе,25.05.2015. (АМИТ «Ховар», Мавҷуда Анварӣ).-Бо мақсади ҷалби тавваҷуҳи аҳли ҷомеа ба масъалаҳои марбут ба ҳимояи ҳуқуқу манфиатҳои кӯдакон ва амалӣ намудани сиёсати пешгирифтаи давлат дар самти таъмини ҳифзи ҳуқуқи кӯдакон, бахшида ба таҷлили Рӯзи байналмилалии муҳофизати кӯдакон -1 июн бо қарори раиси вилояти Хатлон рӯзҳои 24 — 31 майи соли 2015 дар қаламрави вилояти Хатлон таҳти унвони «Солимӣ, зебоӣ, масъулият-ояндаи ҷомеа» чорабинӣ гузаронида мешавад.Дар доираи чорабиниҳои ҳафта дар ҳамаи муассисаҳои таҳсилоти умумӣ, мактаб-парваришгоҳҳо, боғчаҳои бачагонаи шаҳру навоҳии вилоят гузаронидани чорабиниҳои фарҳангӣ, мусобиқаҳои варзишӣ ва озмунҳои фарҳангӣ «Суханвари беҳтарин», «Овозхони беҳтарин», «Рақси беҳтарин», «Навозандаи беҳтарин», «Рассоми беҳтарин», «Чирадасти моҳир» ва бо туҳфаҳои хотиравӣ ҳавасманд намудани ғолибон ба нақша гирифта шудааст. Беҳтаринҳо барои соҳиб шудан ба ҷойҳои ифтихорӣ рӯзи 30 май дар озмуни вилоятӣ дар шаҳри Қӯрғонтеппа иштирок намуда, бо туҳфаҳои раиси вилояти Хатлон сарфароз гардонида мешаванд. Дар озмуни мазкур кӯдакони то 18-сола иштирок карда метавонанд.Барои ишғоли ҷойи аввал ба 6 нафар Ифтихорнома ва туҳфаҳои хотиравӣ дар ҳаҷми 400 сомонӣ, ҷои дуюм ба 6 нафар Ифтихорнома ва 300 сомонӣ ва инчунин туҳфаҳои хотиравӣ барои 8 нафар иштирокчии фаъоли озмунҳо ва 6 нафар мураббӣ дар ҳаҷми 100 сомонӣ пешбинӣ шудааст.Мақсади озмун бедор намудани ҳисси ватандӯстию ифтихори миллӣ, эҳтироми волоияти қонун, ташвиқу таблиғи тарзи ҳаёти солим, пешгирии амалҳои номатлуб ва ба ҳуқуқвайронкунию ҷиноят даст задани ноболиғон, дарёфти истеъдодҳои беҳтарин аз миёни кӯдакон мебошад.