С. Жао: «Чанд лоиҳаро барои рушди иқтисодиёти ҶТ амалӣ хоҳем кард»

Душанбе, 18. 05. 2015. (АМИТ «Ховар», Мавҷуда Анварӣ).- Имрӯз Президенти кишвар Эмомалӣ Раҳмон ноиби президенти Бонки давлатии рушди Чин Сиаою Жаоро ба ҳузур пазируфт. Сиаою Жао баъди мулоқот бо Сардори Давлат дар назди хабарнигорон изҳор намуд, ки   аз он дастовардҳое, ки Президенти Ҷумҳурии Тоҷикистон дар доираи рушди иқтисодиёти кишвар ноил гаштааст, дар ҳайрат мондааст. 
Намояндаи ин ниҳоди бонуфузи молиявии Чин зикр намуд, ки ҳангоми суҳбат бо Ҷаноби Президент аз ниятҳои ҷониби Тоҷикистон дар амалӣ намудани барномаҳои иқтисодӣ бохабар шуда, дар бораи бисёр масъалаҳое, ки имрӯз барои ҳукумати ҶТ афзалиятнок ҳисоб мешаванд, маълумоти хуб гирифтааст. Барои амалӣ намудани лоиҳаҳои ба рушди иқтисодиёти ҶТ нигаронида шуда бо Ҳукумати ҶТ, сохторҳои бонкии кишвар ва инчунин бо соҳибкорони кишвар дар оянда аз наздик омодагии ҳамкорӣ карданро баён намуд. 
«Мо ба мувофиқа омадем, ки як барномаи нави ҳамкориҳоро байни Ҷумҳурии Тоҷикистон ва Бонки давлатии рушди Чин тарҳрезӣ кунем. Тавре ки шумо медонед, Бонки давлатии рушди Чин имрӯз яке аз бонкҳои пешқадамтарини дунё мебошад, ки ба кишварҳои гуногуни дунё қарзҳо пешниҳод карда истодааст ва маблағи умумии карзҳое, ки имрӯз мо ба кишварҳои хориҷӣ пешниҳод намудем, 300 миллиард доллари амрикоиро ташкил медиҳад. Вобаста ба  маблағҳои пешниҳодкардаи мо ба Ҷумҳурии Тоҷикистон  ман гуфта метавонам, ки имрӯз барои боз ҳам беҳтар кардани муносибатҳои байни Бонки давлатии рушди Чин ва Ҷумҳурии Тоҷикистон корҳои зиёдеро бояд ба анҷом расонид. Гурӯҳҳои мо ва инчунин ҳамкорони мо метавонанд барои беҳтар намудан ва  ё баланд бардоштани сатҳи ҳамкориҳои иқтисодӣ дар оянда лоиҳаҳои бисёреро амалӣ намоянд. Мо дар ояндаи наздик якчанд лоиҳаро барои рушди иқтисодиёти ҶТ амалӣ хоҳем намуд ва дар ин ҷода мо интизор ҳастем, ки бо дастгирии Ҳукумати ҶТ бо сохтори бонкӣ ва инчунин бо соҳибкорони кишвар аз наздик ҳамкорӣ мекунем»,-иброз намуд Сиаою Жао.