Вохӯриҳои М.Ҷабборӣ дар ноҳияи Шаҳритус

Душанбе, 19.05.2015. (АМИТ «Ховар»).- Муовини Сарвазири Ҷумҳурии Тоҷикистон Марҳабо Ҷабборӣ дар ҳошияи сафараш ба ноҳияи Шаҳритус  аз Беморхонаи марказии ноҳия боздид намуда, бо шароити фаъолияти духтурон шинос шуд.
Муовини Сарвазир  аз литсейи касбии техникӣ, ки дар он мутахассисони соҳаҳои мухталифи техникӣ тарбия мешаванд, боздид намуд. Мавсуф зимни вохӯрӣ бо донишҷӯёни литсей изҳор дошт, ки  Ҳукумати ҷумҳурӣ кадрҳои ҷавонро ҳамаҷониба дастгирӣ менамояд.
«Ояндаи хатмкунандагон вобаста ба вазъи тарбияи онҳост. Халқи тоҷик бо маърифату фарҳанги худ ва тарбияи наврасон ҳамеша фарқ мекард, бинобар ин ҷавонон  бояд ба қадри ғамхориҳо дар ҳаққашон расанд »,-гуфт М.Ҷабборӣ.
Муовини Сарвазир ба роҳбарияти литсей дастур дод, ки барои таъмини таҳсилоти хушсифати насли ҷавон ҳамаи имконоти мавҷударо истифода намояд.
Сипас  М.Ҷабборӣ бо деҳқонони хоҷагии «Раҳматшобобо» вохӯрд. Алҳол деҳқонони хоҷагии мазкур дар масоҳати 6 гектар кишт карда, қисми зиёди деҳқонони онро занон ташкил медиҳанд. «Тарбияи насли наврас ва рушди тиб ба андозаи зиёд вобаста ба занон аст. Агар мо дар ҷараёни тарбияи ҷавонон ба  саҳлгирӣ роҳ диҳем, ин метавонад ба ояндаи насли ҷавон таъсири манфӣ расонад»,- зикр намуд М.Ҷабборӣ.
Занони хоҷагӣ гуфтаҳои муовини Сарвазири Ҷумҳурии Тоҷикистонро  бо камоли самимият пазируфта, изҳор доштанд, ки онҳо ҳамеша ба рушди ҷомеа мусоидат хоҳанд кард.
М.Ҷабборӣ дар ҷамоати  Сайёд аз маҷмааи таърихии «Хоҷа Машҳад» боздид намуда, ҳамчунин бо фаъолияти ҷавондухтароне, ки ба бахиядӯзӣ машғуланд, шинос шуд.
Сипас М.Ҷабборӣ бо аъзои оилаи Муродалиевҳо шинос шуд. Қобили зикр аст, ки хонаводаи мазкур ҳафт писар дорад, ки аксарияташон дорои маълумоти олӣ буда ва он барои мардуми ноҳияи Шаҳритус намуна аст.
«Бояд корҳои тавзеҳотии байни ҷавонон роҳандозӣ шуда, натиҷаҳои хуби тарбияи насли наврас аз мисоли чунин оила дар байни мардум ташвиқу тарғиб гарданд »,- афзуд дар хотима муовини Сарвазир.
Марҳабо Ҷабборӣ ҳамчунин аз мактаб-интернати ноҳияи мазкур боздид намуда, бо шароити зиндагӣ ва таълими хонандагон шинос шуд ва ба кӯдакон китобҳои ҷолибро тақдим намуд.