Ю. Раҳмон: «7700 шаҳрванди Тоҷикистон дар маҳбасҳои Русияанд»

Душанбе, 20.05.2015.(АМИТ «Ховар», Марзия Саидзода).- «Алҳол дар маҳбасҳои Русия 7 ҳазору 700 нафар шаҳрванди Ҷумҳурии Тоҷикистон бо гуноҳҳои мухталиф адои ҷазо менамоянд»,- гуфт Юсуф Раҳмон –прокурори генералии Ҷумҳурии Тоҷикистон 20 май дар назди вакилони Парлумони кишвар. Мавсуф афзуд, ки бо вуҷуди оне, ки байни Ҷумҳурии Тоҷикистон ва Русия Шартнома дар мавриди бозпас гардонидани маҳбусон, инчунин Конвенсияи Минск аз соли 1993 вуҷуд дорад, мо мутаассифона, имконияти бозпас гардонидани тамоми маҳбусонро ба кишвар надорем. Юсуф Раҳмон таъкид кард, ки соле ба Тоҷикистон ҳудудан аз 50 то 100 нафар маҳбуси тоҷик аз Русия бозпас гардонида мешавад. Ин дар ҳолест, ки 20 май вакилони палатаи поёнии Парлумони Тоҷикистон Шартномаи байни Ҳукумати Ҷумҳурии Тоҷикистон ва Ҷумҳурии Мардумии Чин оид ба бозпас гардонидани маҳкумшудагонро ба тасвиб расонданд.