12 -15 июл ҳарорати ҳавои кишвар аз 40 дараҷа боло қарор мегирад

            Душанбе, 06.07.2015.(АМИТ «Ховар», Марзия Саидзода).-Чангу  ғуборе, ки аз биёбонҳои  Туркманистон бархоста,   аз дишаб ҳавои кишвари моро фаро гирифтааст, шоми имрӯз батадриҷ аз байн меравад. Дар ин бора ба АМИТ «Ховар» Сайёра Навҷувонова- мутахассиси Маркази обуҳавошиносии кишвар иттилоъ дод. Мавсуф афзуд, ки аз 12 то 15 июл бо ворид гардидани ҳавои гарми саудӣ ҳарорати ҳаво дар кишвар баланд гардида, дар ин муддат ҳарорати ҳаво дар қисмати ҷанубии ҷумҳурӣ  -вилояти Хатлон 40-45 дараҷа, Суғд 37-39 ва Душанбе 38-43 дараҷа гарм мешавад. Танҳо 10 июл ҳарорати ҳаво дар ҷумҳурӣ 2-3 дараҷа паст мефарояд.
    Чунин ҳавои гарми тоқафарсо дар соли равон аксари кишварҳои минтақаро фаро гирифта, сабабаш ворид гардидани ҳавои гарм ва хушк аз биёбонҳои нимҷазираи Арабистони Саудист.   Назар ба иттилои  мутахассиси  Маркази обуҳавошиносии  кишвар аз 30 июн то 5 июл дар ҷумҳурӣ ҳарорати ҳаво аз меъёр баланд гардида, дар ҷануби ҷумҳурӣ, хусусан нуқтаи гармтарини кишвар -Айвоҷ ақрабаки ҳароратсанҷи ҳаво болои 46 дараҷа дакка хӯрд.
7 июл  дар ҷумҳурӣ ҳавои гарму бебориш боқӣ монда, дар вилояти Хатлон шабона 23-28, рӯзона 38-42 дараҷа гарм, дар Суғд шабона 18-23, рӯзона  35-40 дараҷа гарм, дар ноҳияҳои тобеи ҷумҳурӣ  шабона 17-20,  рӯзона 35-40 дараҷа гарм мешавад. Дар қисми ғарбии Вилояти мухтори  кӯҳистони Бадахшон  шабона 13-18  ва рӯзона 31-36 дараҷа гарм, дар шарқи ҳамин вилоят шабона 2-7 дараҷа ва рӯзона 18-23 дараҷа гарм мешавад. Фардо ҳавои пойтахти кишвар -шаҳри Душанбе рӯзона 38-40 ва шабона 19-21 дараҷа гарм мешавад.