Агентии омор: рамзгузории субъектҳои бақайдгиранда дар реҷаи Он-лайн амалӣ мегардад

 Душанбе, 24.07.2015.(АМИТ «Ховар», Раъно Нусратуллозода).-Барои  мукаммалсозии низоми баҳисобгирии оморӣ аз ҷониби намояндагони як зумра  вазорату идораҳои дахлдор гурӯҳи кории байниидоравӣ таъсис дода шуд. Аз тарафи гурӯҳи корӣ сараввал ба омори саноат диққати махсус дода, барои бо ҳисобот пурра фаро гирифтани корхонаҳо ва масъалаи андози иҷтимоӣ аҳамияти зарурӣ дода шуд. Дар ин бора имрӯз зимни нишасти матбуотӣ директори Агентии омори назди Президенти Ҷумҳурии Тоҷикистон Гулнора Ҳасанзода иттилоъ дод.
Г.Ҳасанзода изҳор дошт, ки дар нимсолаи аввали соли ҷорӣ рӯйхати корхонаҳои амалкунанда аз нав таъсис дода шуда, дар якҷоягӣ бо мутахассисони Вазорати саноат ва технологияҳои нави Ҷумҳурии Тоҷикистон ва Кумитаи андози назди Ҳукумати Ҷумҳурии Тоҷикистон дар асоси маълумоти низоми «Равзанаи ягона» дақиқ карда шуд, ки  маълумоти оморӣ тибқи таснифоти намуди фаъолияти иқтисодии корхонаю ташкилот ва тобеияти идоравӣ ташаккул ва такмил  шуданд. Дар айни замон рамзгузории субъектҳои бақайдгиранда дар реҷаи  Он-лайн амалӣ гардида, то 1 июли соли ҷорӣ шумораи субъектҳои бақайдгирифташуда 422,2 ҳазор ададро ташкил намуд, аз  ҷумла дар равзанаи ягона 416,1 ҳазор ададро ташкил кард, ки аз онҳо 379,7 ҳазор  соҳибкори инфиродӣ ба қайд гирифта шудаанд.