Амалиёти террористии фидоии 18 — сола дар Туркия

Душанбе, 21.07.15. (АМИТ «Ховар»). – Назар  ба  хабари агентии Sputnik, террорист – фидоии  18 – сола  дар  шаҳри Суручи Туркия , ки  тақрибан  10  километр  дуртар  аз  сарҳади  Сурия  воқеъ  аст,   таркиш  ба  амал  овард. 
Ин  хабар ҳанӯз  ба таври  расмӣ тасдиқ  нашудааст,  вале  ҳукматдорони  кишвар тахмин  мекунанд, ки таркиш амали  яке  аз  аъзои  гурӯҳи  «Давлати  исломӣ» буд. 
Ба  гуфтаи  сарвазири  Туркия  Аҳмад  Довудоғлу, «ҳуҷҷатҳои  дар  маҳалли ҷинояткорӣ бадастомада  шаҳодат  медиҳанд, ки  ДИ «бомбаи  зинда» — ро  мавриди истифода  қарор  додааст».
Мувофиқи  маълумоти  охирин, бар  асари  амалиёти террористӣ 31  нафар  ҳалок  гардида,  беш  аз  100  нафар  осеб  дидаанд. Қаблан  аз  хусуси  27  нафар  ҳалокшудагон  хабар  дода шуда буд.
20  июл  дар  маркази  фарҳанги  шаҳри  Суруч  асбоби тарканда ба  кор  дароварда шуда буд. Гуфта  мешавад, ки  дар  ин  лаҳза  дар  биное  нишасти  матбуотӣ дар  мавриди  бозсозии  шаҳри Кобани, ки  аз  моҳи  октябри  соли  2014 то  моҳи  январи  соли  2015  таҳти  муҳосираи  силоҳбадастони  ДИ  қарор  дошт, доир шуда буд.