Ҷавонони Тоҷикистон дар Бадахшон муттаҳид мешаванд

Душанбе, 12.07.2015 (АМИТ «Ховар», Некрузи Муҳаммадсодиқ) — Имрӯз беш аз 150 нафар ҷавонон аз минтақаҳои гуногуни кишвар барои иштирок дар семинари илмӣ-амалӣ таҳти унвони «Мақомоти корҳои дохилӣ ва ҷавонон: ҳамкорӣ дар бартарафсозии ақидаҳои экстремистӣ- ифротгароӣ » бо шиори «Мо Бадахшон меравем » ба роҳ баромаданд.
Семинари мазкур бо ибтикори Кумитаи ҷавонон, варзиш ва сайёҳии назди Ҳукмати Ҷумҳурии Тоҷикистон дар якҷоягӣ бо Вазорати корҳои дохилии Ҷумҳурии Тоҷикистон аз 12 то16 июли соли равон дар шаҳри Хоруғи Вилояти Мухтори Куҳистони Бадахшон доир мегардад.
Дар кори семинар бештар аз 300 нафар ҷавонон аз тамоми манотиқи кишвар ширкат меварзанд. Ҳамчунин дар доираи ин семинар ҷавонон аз мевзеъҳои зебои шаҳру ноҳияҳои ВМКБ дидан карда, бо таъриху фарҳанг, урфу одат, анъанаҳои миллӣ ва мавзеъҳои сайёҳию диданӣ аз наздик ошно мегарданд.
Мақсад аз баргузории семинар пешгирӣ намудани ҷавонон аз гаравидан ба ҳизбу ҳаракатҳои иртиҷоӣ, огоҳ намудани онҳо аз мақсаду ҳадафҳои гурӯҳҳои ба ном исломӣ, баланд бардоштани ҳисси миллию худшиносӣ ва ба ин васила мустаҳкам намудани дӯстӣ миёни ҷавонони тамоми минтақаҳои ҷумҳурӣ арзёбӣ мегардад .