Бадахшон: Бунёди хонаҳо барои осебдидагони сел оғоз гардид

Хоруғ, 23.07.2015. (АМИТ «Ховар», Файз Мираҳасан).- Дар  деҳоти Барсем, Бердибекобод, Колхозободи    ҷамоати Сучони ноҳияи Шуғнон, ки бар асари офати табиӣ зарар дида буданд, корҳои сохтмонӣ     оғоз ёфтанд.
Раиси вилоят Шодихон Ҷамшед ба роҳбарони ҳар як идораву муассиса супориш дод, ки барои хонаводаҳои зарардида манзил бунёд  кунанд. Корманди Хадамоти оташнишонии  вилоят   Шаҳмар Суҳробов  иброз медорад, ки: «Дар натиҷаи  офати табиӣ  мардум  аз хонаҳои истиқоматии худ маҳрум гаштанд.   Бар дӯши идораи мо  сохтмони як хонаи истиқоматӣ гузошта шудааст ва мо итминони комил дорем, ки дар  муҳлати кӯтоҳтарин  онро  мавриди истифода қарор медиҳем».  Идораву муассисаҳои дигар низ ба сохтмони хонаҳо барои  осебдидагон  оғоз намуданд.  Бояд зикр намуд, ки барои осебдидагон  хонаҳои урфии бадахшонӣ  сохта мешаванд. Масолеҳ барои бунёди  сохтмон аз тарафи ҳукумати Ҷумҳурии Тоҷикистон ройгон ҷудо гардида, аллакай вориди шаҳраки муваққатӣ гардонида шуд.
Дар қатори бунёди хонаҳои истиқоматӣ  дар ин ҷо  мактаб, мағоза ва  бунгоҳи тиббӣ, инчунин иншооти муҳими инфрасохторӣ  сохта хоҳанд шуд.