Боздиди Сарвари давлат аз рафти корҳои сохтмонию барқарорсозии НБО Роғун

Душанбе, 15.07.2015. (АМИТ “Ховар”). — Дар доираи сафар ба шаҳри Роғун Президенти Ҷумҳурии Тоҷикистон Эмомалӣ Раҳмон баҳри шиносоӣ бо рафти корҳои барқарорсозӣ ва суҳбат бо бинокорони Нерӯгоҳи барқи обии Роғун ба мавзеи бунёди ин иншоот ташриф овард. 
Сарвари давлат Эмомалӣ Раҳмон дар нерӯгоҳ аз тамоми қитъаҳои сохташавандаи рӯизаминӣ ва иншооти асосии зеризаминӣ дидан кард. Аз сифати хуби корҳои барқарорсозӣ, идомаи сохтмон ва руҳияи баланди бунёдкорони ин иншоот аён гашт, ки дастуру ҳидоятҳои Президенти мамлакат Эмомалӣ Раҳмонро оид ба устувору босифат анҷом додани ҳар як амал сармашқи кори худ кардаанд. 
Мавриди зикр аст, ки ин ташрифи Сарвари давлат Эмомалӣ Раҳмон идомаи сафарҳои қаблӣ ба маҳалли бунёди НБО Рогун буда, дар рафти он Президенти мамлакат бо коргарону мутахассисони сершумори ин нерӯгоҳ суҳбатҳо доир намуд.
Сарвари давлат Эмомалӣ Раҳмон бори дигар таъкид дошт: «ҳар як бинокори ин иншооти тақдирсоз бояд хуб эҳсос намояд, ки нерӯгоҳи Роғун барои садсолаҳо пешбинӣ шудааст ва сифати корҳо бояд ба ин ҳадафи воло мутобиқ бошад». Президенти кишвар Эмомалӣ Раҳмон, ҳамчунин изҳор дошт, ки: «нерӯгоҳи Роғун бояд асрҳо ба мардуми Тоҷикистон ва кулли минтақа хизмат карда, танҳо манфиат расонад ва ҳеҷ зиёне надошта бошад». 
Ба Президенти мамлакат Эмомалӣ Раҳмон иттиллоъ дода шуд, ки Ҷамъияти саҳомии кушодаи Нерӯгоҳи барқи обии Роғун ҳамчун фармоишгар назорат ва таъмини корҳои сохтмону барқарорсозии иншоотро дар асоси маводи лоиҳавӣ анҷом дода, ҳамкориро бо пудратчиёну зерпудратчиён дар сатҳи лозимӣ ба роҳ мондааст.
Корҳои сохтмону васлгарӣ ва таъмиру барқарорсозӣ дар иншооти НБО Роғун мутобиқи ҷадвали тақвимии баистифодадиҳии навбати аввали нерӯгоҳ бо сифати баланд ва тибқи тавсияҳои коршиносони Бонки ҷаҳонӣ ҷараён доранд.