КДАМ ҶТ: Боздошти 81 вайронкунандаи низоми сарҳадӣ

Душанбе, 15.07.2015. (АМИТ «Ховар», М. Темурзода).- Ҷаласаи натиҷаҳои хизматӣ-ҷангии қӯшунҳои сарҳадии КДАМ ҶТ дар нимсолаи аввали соли 2015 ва оид ба муайян намудани вазифаҳои хизматии нимсолаи дуввуми соли равон дирӯз дар Душанбе баргузор гардид.
Дар ҷаласа раиси Кумитаи давлатии амнияти миллии Ҷумҳурии Тоҷикистон Саймуъмин Ятимов,фармондеҳи қӯшунҳои сарҳадии КДАМ ҶТ Раҷабалӣ Раҳмоналӣ, муовинони фармондеҳ, сардорони раёсатҳо ва сардорони ҳамаи қисмҳои ҳарбӣ ва ҷузъу томҳои Сарраёсати қӯшунҳои сарҳадии КДАМ ҶТ иштирок намуданд.
Тавре ки аз Сарраёсати қӯшунҳои сарҳадии  КДАМ  ҶТ ба АМИТ «Ховар» иттилоъ доданд, дар давраи сипаришуда аз тарафи ҳайати шахсии Сарраёсати қӯшунҳои сарҳадӣ корҳои муайян доир ба ҳифзи сарҳади давлатӣ, аз сарҳад гузаронидани шахсони воқеӣ ва воситаҳои нақлиёт, мубориза бар зидди қочоқи маводи нашъаовар гузаронида шуданд.
Хизматчиёни ҳарбии Сарраёсати қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар нимсолаи аввали соли 2015  зиёда аз 657 кг 199 гр. маводи нашъаовар,  аз ҷумла 45 кг  921 гр. героин, 254 кг 930 гр. афюн  ва  365 кг 318 гр. маводи гурӯҳи каннабис аз қочоқчиёни афғон  мусодира намуда,  279 ҳазору  961 бех ниҳоли банги ҳиндиро сӯзониданд.
Ғайр аз ин дар ин давра 62 ҳодисаи вайрон кардани сарҳади давлатӣ,  44 ҳодисаи вайрон кардани реҷаи сарҳади давлатӣ пешгирӣ шуда, 54  вайронкунандаи сарҳад,  81 вайронкунандаи низоми сарҳадӣ боздошт  шуд.