Кумакҳои Сарвари давлат ба аҳолии аз офати табиӣ зарардидаи Бадахшон

Душанбе, 17.07.2015. (АМИТ «Ховар»). — Имрӯз бо супориши Президенти Ҷумҳурии Тоҷикистон Эмомалӣ Раҳмон ба зарардидагони офати табиии Вилояти Мухтори Куҳистони Бадахшон кумаки ғизоӣ ирсол гардид. Тавре аз комиссияи махсуси ҳукуматӣ доир ба назорат ва рафъи оқибатҳои офати табиӣ ба АМИТ «Ховар» иттилоъ доданд, аз ҷумла орд, шакар, равған, макарон ва дигар маводи ғизоӣ ба ин зарардидагони офати табиӣ расонида шуд. Бино ба иттилои манбаъ аз комиссия мазкур, шоми имрӯз дар ин минтақа боз обхезӣ ба амал омада, дар натиҷа 5 хонаи дигарро дар деҳаи Колхозобод пурра нобуд сохт. Мавриди зикр аст, ки ҳоло дар ҷои ҳодиса бо супориши Сарвари давлат комиссияи махсус фаъолият карда, барои кӯчонидани аҳолӣ ба ҷойҳои бехавф ва рафъи окибатҳои ин офати табиӣ чораҳои зарурӣ андешида мешаванд.