Масъулин ба маводи танқидии ТВ «Сафина» кам вокунин нишон додаанд

 Душанбе, 09.07.2015.(АМИТ «Ховар», Марзия Саидзода).-Аз 35 маводи танқидӣ- таҳлилӣ, ки тавассути барномаҳои иттилоотии телевизиони «Сафина» дар нимсолаи аввали соли равон оид ба масоили мухталифи ҷомеа таҳия ва пахш гардидаанд, танҳо ба 6 мавод масъулини мақомоту сохторҳои марбута вокуниш нишон додаанд. 
    -Дар оянда,-мегӯяд роҳбари тозатайъини «Сафина» Зевар Давлатзода, гузоришҳои танқидӣ дар барномаҳои иттилоотии «Навид» ва «Ҷамъбасти ҳафта»  пахш хоҳанд шуд, ки онҳо ба ҳалли проблемаю норасоиҳое, ки дар ҷомеа ҷой доранд, мусоидат менамоянд.
      Таъкид шуд, ки аз 35 маводи таҳлилӣ-интиқодӣ  16- тоаш аз шаҳру навоҳии вилояти Хатлон, 10 тоаш аз вилояти Суғд, аз ноҳияҳои тобеи марказ буда, 1 маводи интиқодӣ ва 8 маводи танқидӣ ба шаҳри Душанбе рост меоянд.   
   Инчунин дар ин давра фаъолияти намояндагиҳои ТВ «Сафина»  дар минтақаҳои гуногуни кишвар  чашмрас арзёбӣ гардид. Хусусан дар филиали муассиса дар вилояти Суғд  дар ин давра беш аз 50  барномаи таҳлиливу иттилоотӣ, фарҳангиву фароғатӣ ва нашрҳои махсус аз ҷараёни сафари Президенти кишвар Эмомалӣ Раҳмон ба шаҳру навоҳии ин вилоят  пешкаши тамошобинон гардонида шуд. Дар маҷмӯъ, дар ин давра беш аз 100 гузориш, лавҳаву маводи иттилотӣ ва таҳлиливу танқидӣ аз ҳаёти сиёсиву иқтисодӣ ва иҷтимоию фарҳангии ин вилоят таҳия  ва тавассути барномаҳои ТВ «Сафина» пахш гардиданд.       Дар филиали ТВ «Сафина» дар вилояти Хатлон ҳам  дар зарфи шаш моҳ 12 барнома, 180 гузориш  ва 6 маводи  таҳлилӣ омода гардиданд, ки ба соҳаҳои мухталифи хоҷагии халқи вилоят бахшида шудаанд.
   Барномаи «Бадахшон чатри симини замин аст», ки муҳимтарин рӯйдодҳои ҳаёти иҷтимоию фарҳангии ин минтақаи дурдасти кишварамонро инъикос менамояд, дар ин давра ҳафтае як маротиба пешкаши тамошобинон гардонида мешуд.