Мавҷи ҳавои гарми саудӣ ба сӯи кишвари мо ҳаракат дорад

          
Душанбе, 10.07.2015.(АМИТ «Ховар», Марзия Саидзода).-Ҳавошиносони кишвар иттилоъ доданд, ки  аз 12 то 15 июл дар ҷумҳурӣ ҳавои гарму тоқатфарсо ҳукм ронда,  дар ин рӯзҳо дар манотиқи ҷануби кишвар-вилояти Хатлон ҳарорати ҳаво ба 40-45 дараҷа мерасад.
      Сайёра Навҷувонова -мутахассиси Маркази обуҳавошиносии ҷумҳурӣ дар суҳбат ба хабарнигори АМИТ «Ховар» гуфт, ки  дар моҳи равон ин дуюмин раванди воридшавии ҳавои гарм аз нимҷазираи Арабистони Саудӣ ба кишварамон мебошад. Воридшавии мавҷи ҳавои гарму хушки саудӣ ба кишвари мо, ки сарзамини офтобист,   ҳолати муқаррарӣ буда, он ҳамасола асосан дар фасли тобистон мушоҳида мегардад. 
        Дар ин рӯзҳо ҳарорати ҳаво дар вилояти Хатлон шабона 20-30, рӯзона 40-45 дараҷа гарм, дар шимоли кишвар — вилояти Суғд шабона 21-26, рӯзона 38-43 ва дар навоҳии тобеи марказ шабона 20-25, рӯзона 38-43 дараҷа гарм мешавад.
      Дар навоҳии Вилояти Мухтори  Кӯҳистони Бадахшон дар ин рӯзҳо ҳарорати ҳаво дар қиёс ба дигар минтақаҳои кишвар нисбатан салқин буда, марудми ин минтақаи баландкӯҳи кишварамонро  гармии тоқатфарсо азият намедиҳад, зеро ҳарорати ҳаво  дар рӯзҳои  12-15 июл дар шарқи Бадахшон шабона 16-21, рӯзона 32-37 ва дар ғарби Бадахшон  шабона 4-9, рӯзона 21-26 дараҷа гарм мешавад.
      Дар рӯзҳои 12-15 июл ҳарорати  ҳавои пойтахти ҷумҳурӣ -шаҳри Душанбе  шабона  ба  20-22 ва рӯзона ба 40-42 дараҷа гармӣ мерасад. 
         Имрӯз, 10 июл ҳавои пойтахти ҷумҳурӣ рӯзона 36-38 ва шабона 17 -19 дараҷа гарм мешавад.