Медали «20-солагии қӯшунҳои сарҳадӣ» ба раиси ноҳияи Спитамен

Хуҷанд, 29.07.2015. (АМИТ «Ховар»).-Тавре ки аз хадамоти матбуоти раиси вилояти Суғд иттилоъ доданд, чанде пеш и.в. раиси ноҳияи Спитамен Хоҷазода Ориф Ашӯрӣ аз қисмҳои низомии мустақар дар ноҳияи Спитамен дидан намуда, бо шароити зиндагӣ ва фароғату  тамрини сарбозону афсарон ошно гардид. Зимнан, бо ташаббуси мақомоти иҷроияи маҳаллӣ боми мошинсарой ва майдончаи тамрини қисми ҳарбии 2110 қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар ноҳияи Спитамен, воқеъ дар ҷамоати деҳоти Сарбанд таъмир гардид. Дар арафаи таҷлили рӯзи қӯшунҳои сарҳадӣ раиси ноҳия ба ин қисми низомӣ 1 адад телевизор тақдим намуд.
Барои чунин ташаббусҳо бо фармони фармондеҳи қӯшунҳои сарҳадии КДАМ ҶТ барои саҳми беандоза дар ободонии қисмҳои ҳарбӣ ва иштироки фаъолона дар баланд бардоштани омодагии ҷангии ҷузъу томҳои қисмҳои сарҳадӣ и.в раиси ноҳия Хоҷазода Ориф Ашӯрӣ ва раиси ҷамоати деҳоти Сарбанди ноҳия Насим Деҳқонбоев бо медали «20-солагии қӯшунҳои сарҳадӣ» сарфароз гардонида шуданд.