Муҳоҷирони экологӣ бо қарзи имтиёзнок ва кумаки моддӣ таъмин гаштанд

Душанбе, 18.07.2015. (АМИТ «Ховар», Лайло Тоирӣ).-Тавассути  сохторҳои Бонки давлатии амонатгузории Ҷумҳурии Тоҷикистон “Амонатбонк” дар шаҳру ноҳияҳои ҷумҳурӣ бо мақсади таъмин намудани муҳоҷирони экологӣ бо қарзи имтиёзнок ва кумаки якдаъфаинаи моддӣ барои пардохт 541 ҳазору 100  сомонӣ интиқол дода шуд.
Тавре ки аз Вазорати меҳнат, муҳоҷират ва шуғли аҳолӣ иттилоъ доданд, соли  2015 дар ҷумҳурӣ 481 оила ихтиёрӣ бояд кўчонида шавад. 
Ба ҳолати 22 июни соли равон дар ҷумҳурӣ ба 313 оилаи муҳоҷири дохилӣ  қитъаи замин барои сохтмони манзил ҷудо гардида ва муҳоҷирон дар мавзеъҳои нави зист ба қайд гирифта шудаанд, ки ин 65%-и нақшаи солонаро ташкил медиҳад, аз ҷумла дар вилоятҳои  Хатлон  125  оила,  Суғд  73 оила ва НТҶ 115 оила.
Соли равон бояд 350 хоҷагӣ аз минтақаҳои хавфноки экологӣ ба мавзеъҳои бехавф кўчонида шавад. 
Ба ҳолати 1 июли соли 2015 аз шумораи умумии 350 хоҷагӣ 170 адад, аз ҷумла  12 хоҷагӣ аз ВМКБ, 30 хоҷагӣ вилояти Суғд, 107 хоҷагӣ аз вилояти Хатлон ва 21 хоҷагӣ аз НТҶ кўчонида шуд.