Мулоқоти Азим Иброҳим бо осебдидагони офати табиӣ

Шуғнон, 22.07.2015. (АМИТ «Ховар», Файз Мирҳасан).-Рӯзи 22 июл тақсими замин ва оғози корҳои хонасозӣ дар  шаҳраки муваққатӣ барои сокинони осебдидаи  деҳаи Барсеми ҷамоати Сучони ноҳияи Шуғнон дар ҳузури  муовини Сарвазири мамлакат Азим Иброҳим оғоз шуд.  Тибқи  нақшаи генералии  сохтмонӣ, дар баробари  бунёди хонаҳои истиқоматӣ, сохтмони  мағоза, мактаб, бунгоҳи тиббӣ  ва дигар муассисаҳои  зарурии хоҷагии халқ  дар  шаҳраки навбунёди мавзеи  Боғеви ҷамоати Сучон дар нақша гирифта шудааст.
Дар ҳоли ҳозир  барои 70 зарардидаи ҳодисаи табиӣ  қитъаи замин барои бунёди хона ҷудо гардида, рақамгузорӣ шудааст. Тибқи супориши Азим Иброҳим  дар навбати аввал  18  муассисаву   корхонаи вилоятӣ ба  кашондани сангу хок шурӯъ  намуда,  ба корҳои сохтмонӣ  дар  ин мавзеъ  оғоз менамоянд.
Бо ташаббуси Ширкати «Помир-сервис» барои равшанкунии  хиёбони  шаҳраки навбунёд бо истифода аз  дастгоҳҳои  дизелӣ  неруи барқ  таъмин гардидааст. Сохтмони  хатти баландшиддати барқӣ  дар масофаи беш аз 240 метр аз деҳаи Боғев ба ин маҳал бо иқдоми Ширкати  барқии «Помирэнерҷӣ» низ ба роҳ монда шуда, тасмим аст, ки  аз шоми  рӯзи чоршанбе  сокинони маҳаллаи навбунёд  аз хизматрасонии  шабакаҳои барқии «Помирэнерҷӣ» истифода намоянд.
Ба хотири  муҳайё намудани ғизои гарм  бо иқдоми Созмони байналмилалии башардӯстонаи ФОКУС бунёди  ошхона  оғоз гардида, дар сохтмони он ризокорони ҷамоати Поршиневи ноҳияи Шуғнон  саҳм доранд. Барои  таъмини  маводи доруворӣ ва дигар ниёзмандиҳои  вобаста ба   ҳифзи саломатӣ дар   шаҳраки муваққатӣ  ҷамъияти Ҳилоли Аҳмар  ва Раёсати ҳифзи тандурустии вилоят  кумак мекунанд.