Н. Давлатзода: Бо вуҷуди таъсири бӯҳрони молиявӣ теъдоди корхонаҳо афзудааст

 Душанбе, 20.07.2015.(АМИТ «Ховар», Марзия Саидзода).- «Новобаста ба таъсири омилҳои бӯҳрони молиявӣ дар шаш моҳи соли равон  дар Тоҷикистон теъдоди корхонаҳои истеҳсолӣ 21 ҳазору 730 адад афзоиш ёфта, аз ин шумора 292 адади он ба шахсони ҳуқуқӣ мутаалиқ аст». Нусратулло Давлатзода-раиси  Кумитаи андози ҷумҳурӣ  20 июл зимни нишасти матбуотӣ ба хабарнигорон гуфт, ки  бӯҳрони молиявӣ ба фаъолияти истеҳсолӣ ва молиявии корхонаҳо, албатта, таъсири худро расонида истодааст. Мавсуф афзуд, ки дар аксари шаҳру ноҳияҳо  дар мавриди иҷрои нақшаи ҷамъоварии андоз  бо мушкилот рӯ ба рӯ мегардем.  Новобаста аз ин, кормандони  мақомоти андози кишвар саъй менамоянд, ки тамоми имкониятҳоро истифода карда, манбаъҳои иловагии андозро ҳисоб ва пардохт намуда, буҷетро таъмин созанд. 
     Назар ба иттилои роҳбари мақомоти андози кившар бӯҳрони молиявӣ асосан ба корхонаҳои истеҳсолӣ, сохтмонӣ ва ширкатҳое, ки  ба хариду фурӯш машғуланд, таъсир расонидааст, зеро то ҷое мусаллам аст,  воридоти молу маҳсулот дар ин давра ба қаламрави кишвар коҳиш ётаааст, ки ин раванд ба ҷамъоварии андозҳо ва дигар пардохтҳои ҳатмӣ таъсири худро мерасонад.