Нишони Кумитаи ҷавонон, варзиш ва сайёҳӣ қабул гардид

Душанбе, 09,07,2015. (АМИТ «Ховар», Некрӯзи Муҳаммадсодиқ ).- Бо ризоияти бевоситаи Президенти кишвар Эмомалӣ Раҳмон Нишони (логотип)-и Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон қабул карда шуд.  Дар ин бора Наврӯз Қурбонов,  мутахассиси пешбари Бахши таҳлилу иттилооти Кумитаи ҷавонон, варзиш ва сайёҳӣ ба АМИТ «Ховар» иттилоъ дод. 
Ин тасмим зимни таклифу пешниҳоди як гурӯҳ ҷавонон оид ба таҳия намудани нишони кумита ҳангоми истифода дар баргузории силсилаи чорабиниҳои фарҳангиву маърифатӣ ва варзишиву сайёҳӣ дар доираи таҷлили 30 рӯзи ҷавонӣ ва Рӯзи ҷавонони Тоҷикистон 23  май гирифта шуд.     
Вобаста ба он, ки кумита масъули се соҳа: ҷавонон, варзиш ва сайёҳӣ мебошад, нишон низ дар ҳамин замина омода гардидааст, ки чунин шарҳ дорад:  
«Ҷавонон»: дар маркази нишон нахуст рамзи ҷавонон (ҳаҷман калонтар) инъикос ёфтааст, ки аз давлати ҷавон будани Тоҷикистон, яъне синни миёнаи мардум, ки 24,5 солро ташкил медиҳад, шаҳодат медиҳад. Ҳамзамон шумораи зиёди аҳолии Тоҷикистонро шахсони синни 14-30 сола ташкил медиҳанд, ки аз рӯи қонунгузории Ҷумҳурии Тоҷикистон ҳамчун шахсони ҷавон ба ҳисоб мераванд. Ҷавонон  насли идомадиҳанди миллат, таърих, фарҳанг, анаъана, расму оин, забон ва бунёдгузорандаи ояндаи дурахшони Тоҷикистони соҳистиқлол буда, гирифтани Парчами миллии Тоҷикистон бо даст, аз  рамзи эҳтиром ба муқаддасоти миллӣ, пойдорӣ, мустақилият, якдилӣ ва соҳибихтиёрии Тоҷикистон шаҳодат медиҳад. 
«Варзиш»: дар тарафи чапи нишон рамзи пойдорӣ, бардамӣ ва солимии миллат, ақли солим, ҷисми солим ва  ҳаёти солим инъикос ёфтааст, ки нишон аз таваҷҷуҳи давлат ба ин қисмати муҳими ҳаёти инсон арёбӣ мегардад. Варзиш қосиди сулҳу дӯстӣ ва ваҳдати миллатҳо ба ҳисоб рафта, ояндаи дурахшони миллат ва пойдории он, ба фарзандони ҷисман ва рӯҳан солим вобастагӣ дорад. 
«Сайёҳӣ»: дар қисмати рости нишон, рамзи сайёҳӣ, мероси бойи таъриху фарҳангӣ, анъанаҳои неку сулҳпарварона, забонҳои гуногун, фарҳангҳо ва таомҳои миллӣ, табиати нотакрор, обҳои шифобахш, кӯҳҳои осмонбӯс, қалъаву мазор ва оромгоҳи мутафаккирону донишмандон, шоирону нависандагон ва нобиғаҳои ҷаҳонӣ, манзараҳои нотакрору ҳаётбахш ва шифобахш ҳамчун самти афзалиятноки рушди иқтисодиёти миллии кишвар инъикос ёфтаанд. 
«Кураи  замин»: ҳар се рамз дар даруни кураи замин, гетӣ ё даҳр, нишони ҷузъи ҷомеаи ҷаҳонӣ будани ин се соҳа ва дар маҷмӯъ Тоҷикистони соҳибистиқлол мебошад. Аз ҷониби дигар ин мавқеъгирӣ аз пешгуфтори Конститутсияи (Сарқонуни) Ҷумҳурии Тоҷикистон: яъне мо халқи Тоҷикистон  қисми ҷудонашавандаи ҷомеаи ҷаҳонӣ буда, худро дар назди наслҳои гузашта, имрӯз ва оянда масъул ва вазифадор дониста, таъмини соҳибихтиёрӣ ва рушду нумӯи онро дарк карда, истиқлолият ва комилҳукуқии дигар давлатҳоро эҳтиром ва эътироф карда, бунёди ҷомеаи адолатпарварро вазифаи худ қарор додаем, сарчашма мегирад.  
«Ранги Кабуд»: нишон аз рамзи ҷавонӣ, зебоӣ, осмони софу беғубор ва ваҳдату якдилии миллат шаҳодат медиҳад.
Барои муаррифии ин нишона ва соҳибияти он дар гирди рамзи кураи замин номи пурраи Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо ҳарфҳои калони якхела бо се забон дар мавриди истифодаи муколама инъикос ёфтааст. 
Лозим ба ёдоварист, ки қаблан кумита нишон надошт ва минбаъд зимни баргузории тамоми чорабиниҳои фарҳангиву маърифатӣ ва варзишиву сайёҳӣ ин рамз ҳамчун нишони умита истифода мегардад.